Pavlodarda 35 jastaǵy er adam 12 jastaǵy qyzǵa jasaǵan azǵyndyǵy úshin ómir boiyna bas bostandyǵynan aiyryldy, dep habarlaidy Dalanews.kz.
Tengrinews.kz málimetinshe, ol Qylmystyq kodekstiń eki babymen aiyptaldy:
- 121-baptyń 4-bóligi – kámeletke tolmaǵanǵa qatysty seksýaldyq sipattaǵy zorlyq-zombylyq áreketteri;
- 124-baptyń 1-bóligi – 16 jasqa tolmaǵanǵa qatysty azǵyndyq áreketter jasaý.
Qylmystyq is úsh epizodtan turdy jáne jabyq túrde qaraldy. Úkim jariialanǵannan keiin isti júrgizgen sýdia keibir jaittardy ashyp aitty.
Belgili bolǵandai, sottalýshy bes jyl buryn azamattyq nekedegi áieli men onyń eki qyzy – 12 jáne 6 jasar balalarymen birge tura bastaǵan.
"Biyl 25 sáýir men 10 mamyr aralyǵynda K. birneshe ret áieliniń 12 jastaǵy qyzyna qatysty azǵyn áreketter jasaǵan. Úshinshi jaǵdai 20 mamyr kúni tańǵy saǵat 7 shamasynda tirkeldi. Sol sátte ol kámeletke tolmaǵan qyzdyń jasyn anyq bile tura, onyń kózinshe arsyz qylyqqa barǵan", - dedi sýdia Nurlan Aitbaev.
Aiyptalýshy kinásin jartylai moiyndaǵanymen, tergeý kezinde ózin psihikalyq aýrýǵa shaldyqqan etip kórsetýge tyrysqan. Onyń qorǵaýshylary da osy ýájdi alǵa tartty. Alaida sot bul dálelderdi negizsiz dep tapty.
Eksperttiń qorytyndysy boiynsha, sot barysynda psihiatrdyń mindetti qatysýyna eshqandai sebep bolmaǵan.
Sot sheshimimen er adam ómir boiyna bas bostandyǵynan aiyryldy. Sonymen qatar ol jábirlenýshi qyzǵa 7 million teńge kóleminde moraldyq ótemaqy tóleýge mindetteldi. Jazasyn erekshe qaýipsizdik rejimindegi qylmystyq-atqarý júiesi mekemesinde óteidi.
