Pavlodar oblysynda kásiporyn aýmaǵynda bolǵan qaiǵyly oqiǵadan alty adam qaza taýyp, taǵy bir adam aýrýhanaǵa jetkizildi, dep habarlaidy dalanews.kz.
Pavlodar oblystyq densaýlyq saqtaý basqarmasynyń málimetinshe, shaqyrtý 20 shilde kúni saǵat 12:01-de Aqtoǵai aýdanyna qarasty Jolaman aýylyndaǵy kásiporyndardyń birinen túsken.
«Oqiǵa ornynda 1963, 1975, 1983, 1998, 2006 jáne 2009 jyly týǵan alty er adamnyń qaitys bolǵany anyqtaldy. Al 1988 jyly týǵan taǵy bir azamat Aqtoǵai aýdandyq aýrýhanasyna jetkizildi», - dep habarlady basqarma.
BAQ málimetinshe, qaiǵyly oqiǵa Jolaman aýylyndaǵy «Aqtogai Milk» JShS aýmaǵynda bolǵan. Aldyn ala málimet boiynsha, jumysshylar káriz qudyǵynda ornatylǵan elektr sorǵysynyń aqaýyn jóndep jatqan. Keibir aqparat quraldary oqys oqiǵaǵa kómirqyshqyl gazynan ýlaný sebep bolýy múmkin ekenin jazdy.
Osyǵan bailanysty Pavlodar oblysynyń politsiia departamenti qylmystyq is qozǵalǵanyn málimdedi.
«Atalǵan fakti boiynsha qylmystyq is qozǵaldy. Qazaqstan Respýblikasy Qylmystyq-protsestik kodeksiniń 201-babyna sáikes ózge aqparat jariia etýge jatpaidy», - dep habarlady vedomstvo.
Densaýlyq saqtaý basqarmasynyń málimetinshe, aýrýhanaǵa jetkizilgen 1988 jyly týǵan azamatqa ortasha dárejedegi kómirqyshqyl gazynan ýlaný diagnozy qoiylǵan. Qazir oǵan qajetti meditsinalyq kómek kórsetilip jatyr. Dárigerlerdiń aitýynsha, naýqasty Pavlodar qalasyna tasymaldaý qajet emes.
