Pavlodar oblysyndaǵy daýyldan keıin birneshe sheneýnikke sógis jarıalandy, dep habarlaıdy Dalanews.kz.

Pavlodar oblysynyń ákimi Asaıyn Baıhanovtyń aıtýynsha, eńbek demalysynan shyqqannan keıin birden Aqsýǵa baryp, 19 maýsymdaǵy daýyldan keıingi qalanyń jaı-kúıin teksergen.

"Aqsý daýyldyń epısentrinde ornalasty, kóptegen nysan zardap shekti. Ókinishke qaraı, qala turǵyny Marına Pahomova qaıtys boldy. Qaıtys bolǵan adamnyń otbasyna kómek kórsetildi: tıisti ótemaqy tólendi, komýnaldyq qyzmetter úshin eki jylǵa aldyn ala tólem jasaldy, nesıelerin óteýge qarajat bólindi", - dedi ákim.

Degenmen qaladaǵy sheneýnikterdiń jumysyna óńir basshysynyń kóńili tolmady.

"Nysandardy qalpyna keltirý boıynsha kóptegen jumys jasaldy, alaıda jumystardyń qarqyny kóńil kónshitpeıdi. Úsh kún ishinde qulaǵan aǵashtarǵa qatysty, ásirese, komýnaldyq qyzmetterdiń jumysyna kóp shaǵym túsken Aqsý shaǵynaýdanyn tazartý qajet", - dedi ol.

Qaladaǵy shendilerge osy oqıǵadan soń sógis jarıalandy.

"Tótenshe jaǵdaıdan keıingi alǵashqy kúnderi halyqpen keri baılanys jasamaǵany úshin Aqsý ákimine, orynbasaryna jáne apparat basshysyna sógis jarıalandy. Aqsý qalasynyń ákimine ýákiletti organdardyń eki basshysyn qyzmetinen bosatýdy nemese tómendetýdi tapsyrdym. Kelesi aptada qaıtadan kelip, jumystardyń uıymdastyrylýyn tekseremin jáne jeke baqylaýymda ustaımyn", - dedi Baıhanov.

19 maýsymda Pavlodar oblysynda jyldamdyǵy sekýndyna 43 metrge deıin jetetin daýyl soqqan bolatyn.