Pavlodar oblysynda basshylyq Ertis aýdany ákiminiń jańadan taǵaiyndalǵan orynbasaryna jetim balaǵa tiesili páterdi berý týraly sheshim qabyldaǵan, - dep habarlaidy Dalanews.kz Stan.kz aqparat agenttigine siltep.
Basylym málimetinshe, Roza Aqanova 2025 jyly aqpanda Ertis aýdany ákiminiń orynbasary bolyp taǵaiyndalǵan. Buǵan deiin ol uzaq ýaqyt Pavlodar oblysynyń bilim basqarmasy basshysynyń orynbasary bolyp qyzmet atqarǵan.
Jańa laýazymdy eskere otyryp, ol kóship, baspana tabý kerek bolǵan.
“Halyqtyń áleýmettik osal tobyna jatpaityn tulǵalarǵa zańsyz turǵyn úi berý derekteri anyqtaldy. Máselen Ertis aýyly, Mútkenov kóshesi, 32-úi, 10-páter mekenjaiy boiynsha halyqtyń áleýmettik osal toptaryn qamtamasyz etýge arnalǵan páterde aýdan ákiminiń orynbasary Roza Qabibolqyzy Aqanova turady”, – dedi prokýror ádep jónindegi keńeste.
Prokýratýra buǵan deiin de baspananyń tiesili adamdarǵa berilmegenin anyqtaǵan. Sondai-aq, bos turǵan 14 páter bar. Biraq belgili sebeptermen sheneýnikter ony halyqtyń áleýmettik osal toptaryna berý boiynsha jumys júrgizbei jatyr.
Basqarma basshysy ádep keńesinde eshteńeni joqqa shyǵarmaǵan. Ol sheshimdi óz betinshe qabyldaǵanyn aityp, páter kiltin aýdan ákiminiń orynbasaryna ózi tabystaǵan.
“Onda jetim balalar jaldaý shartymen turady. Baspanova degen adam bar. Biraq onyń bul úide turmaǵanyna bir jyldan asyp ketkenin baiqaimyz. Sóitsem, barlyq kommýnaldyq esep, páter aqysy bosqa tólenip jatyr eken. Ári aýdanda turǵyn úi bolmaǵandyqtan, kiltti ýaqytsha Aqanova Roza Qabibolqyzyna berýdi jón kórdim”, – dedi Ertis aýdandyq ekonomika bóliminiń naqty sektorynyń basshysy Qairolla Eleýkenov.
Ádep jónindegi keńes músheleri zańǵa sáikes áreket etý keregin, alaida ákim orynbasarynyń páterde kóp turmaitynyn eskerip, osyǵan bailanysty laýazymdy tulǵaǵa qyzmettik talaptardy tolyq oryndamaǵany týraly eskertý túrindegi tártiptik jaza qoldanýdy usyndy.
