Pavlodar oblysynda bir jylda 5 ret jaldamaly páter aýystyrǵan kópbalaly otbasy baspanǵa qol jetkizdi
Aqpan aiynda óńir basshysy Bolat Baqaýov kóp balaly analarmen kezdeskennen keiin atalmysh sanattaǵy otbasylardy aýdandarǵa kóshirý jóninde tapsyrma bergen edi.
Alǵashqy bolyp 4 bala asyrap otyrǵan 27 jastaǵy Anýar Qapjasarovtyń otbasy Ýspen aýdanyna qonys aýdardy. Kóp balaly otbasy bir jyl ishinde jaldamaly 5 páter aýystyrǵan. Al, jalpy otbasy qurǵan 10 jyldyń ishinde 10-15 páterde turyp shyǵypty.
– Biz uzaq ýaqyt boiy páterden-páterge kóship júrdik, – dedi Anýardyń jubaiy Elena Abylǵazinova. – Eki ulym mektepte 2-shi jáne 3-synyp oqidy. Taǵy bir ulym biyl mektepke barady. Kishisi qyzym 1 ai buryn ǵana dúniege keldi. Ózimiz qalada týyp-óstik. Biyl oblys ákimi kóp balaly analardy jinaitynyn estip, baryp bizde qandai múmkindikter bar ekenin bilgim keldi. Sol jiynda keńes berýshiler bizdi jumyspen qamtý ortalyǵyna jiberdi. Ol jerdegiler kómektesýge ýáde berdi. Kóp uzamai Ýspen aýdanynan habarlasyp, bizge úidi kórsetti. Kúieýime jumys taýyp bergeli otyr. Aýyl sharýashylyǵy baǵytynda jumys atqaratyn bolady. Qalada páter kezegindemiz, – dedi kópbalaly ana.
Ýspen aýdanynyń basshylyǵy kóp balaly otbasyǵa Kovalev aýylynan eki bólmeli úi bergen.
– Turatyn úiimiz óte jaily. Sý úige keledi. Jýynatyn bólme men ájethanasy da bar ishinde. Balalaryma da yńǵaily. Mektep joldyń arǵy betinde ǵana ornalasqan. Qalada jeke úilerde de turyp kórgendikten aýylda turý bizge qiyndyq týdyrmaidy dep oilaimyn. Bolshaqta qus pen mal asyraý da oiymyzda bar.
Shaharda satýshy, júrgizýshi bolyp jumys jasap kelgen erli-zaiyptylardyń otbasy memleket tarapynan eshqandai kómek almaǵan. Ai saiynǵy otbasylyq shyǵyndary 90 myń teńgege jýyqtaidy. Ýspen aýdany jumyspen qamtý jáne áleýmettik baǵdarlamalar bóliminiń basshysy Evgenii Fergaliýk aýdanda kóp balaly 109 otbasy bar ekenin atap ótti.
– Az qamtylǵandar arasynda 19 otbasy áleýmettik kómek alady, – dedi Evgenii Fergaliýk. – Qonys aýdaryp jatqan otbasyǵa úi tegin berildi. Aldaǵy ýaqytta áleýmettik kómek te alatyn bolady.
Oblystyq jumyspen qamtýdy úilestirý jáne áleýmettik baǵdarlamalar basqarmasy basshysynyń orynbasary Gúlnár Kamalovanyń aitýynsha, oblysta 3839 4-ten kóp bala ósirip otyrǵan otbasy bar bolsa, 300-den astamy ataýly áleýmettik kómek alýda.
– Kóp balaly otbasylardyń kóbisin baspana máselesi mazalaidy. Pavlodar qalasynda aýyldyq jerge kóshýge niet bildirip otyrǵan 7 otbasy bar. Kelesi aptada bir otbasy Sharbaqty aýdanyna qonys aýdarmaq, – deidi Gúlnár Kamalova.
Orazbek Saiahat
Foto avtor
