Ol zeınetaqy jınaǵy eń tómengi jetkilikti mólsherge jetken salymshylar onyń bir bóligin alýǵa quqy bar ekenin eske saldy. Bul shek adamnyń jasyna qaraı anyqtalady. Oǵan qatysty esepteýlerdi myna jerden tabýǵa bolady.
- Búgingi kúni Úkimet osy rettegi is-sharany iske asyrý úshin zańnamaǵa túzetýler engizip, joba ázirleıdi. 2021 jyldan bastap talapqa saı keletin qazaqstandyqtar zeınetaqy jınaqtarynyń bir bóligin ala alady dep úmittenip otyrmyz. Bul rette qarajattyń maqsatty paıdalanylýyn qamtamasyz etetin biryńǵaı operatorlar bolady. Eger "salymshyǵa zeınetaqy jınaqtarynyń bir bóligi óz qolyna beriledi me" degen suraqqa kelsek, árıne oǵan "joq" dep jaýap beremiz, - dedi ol TENGRI TV-ǵa bergen suqbatynda.
Onyń aıtýynsha, maqsatty baǵdardy bul arada "Otbasy" banki júzege asyrady, sondyqtan turǵyn úı jaǵdaıyn jaqsartý úshin aqshany paıdalanýda osy bankti qarastyrý usynylady.
- Ipotekalyq nesıe alý úshin tutynýshy júgingen kez-kelgen ekinshi deńgeıdegi bankpen kelisim jasalady. Ol adam "Turǵyn úı qurylys jınaq bankine" habarlasyp, zeınetaqy jınaǵyn paıdalanýǵa quqy bar-joqtyǵyn jáne ondaǵy aqsha alǵashqy tólemge jetkilikti me, joq pa, sony aldymen tekserýi kerek. Osydan soń BJZQ-men aqparattyq ıntegrasıadaǵy TQJB bul málimetti anyqtap, rastaıdy, sodan soń úsh jaqty kelisim jasalady. Qajetti soma TQJB arqyly ekinshi deńgeıdegi bankke aýdarylady. Sońynda aqsha páterdi satýshynyń shotyna baryp túsedi. Qolǵa aqsha berilmeıdi. Aqsha elektrondy operasıa arqyly sońǵy adamǵa jetedi, - dep túsindirdi Shegaı.
Týra osylaı úıdi kúrdeli jóndeýden ótkizý úshin de aqsha bólinedi. Qurylys materıaldaryna, qurylys qyzmetterine qajetti aqyny tóleýdiń bankterde baǵdarlamalary bar. Mine, sonda barlyq qujattar (chekter, qabyldaý-tapsyrý aktileri jáne t.b.) aqshanyń maqsatty baǵyttalǵanyn rastaıdy.
