Paradtan buryn, áskerdiń ázirligin tekserý mańyzdy - Qorǵanys ministri
Májilis alańynda jýrnalistiń saýaldaryna jaýap bergen ministr Qazaqstan Qarýly Kúshteriniń aldynda budan da mańyzdy mindetter turǵanyn atap ótti.
"Sherýdi ótkizý óte qymbat. Bul janar-jaǵarmai, jol aqysy, qyzmetkerlerdiń tamaǵy. Ne mańyzdyraq boldy - oqý-jattyǵýlar ótkizip, jaýyngerlik ázirligimizdi tekserý me, álde paradqa qatysý ma? Osy jaǵdaida Joǵarǵy Bas Qolbasshynyń tapsyrmalaryn oryndaýdy eskere otyryp, osy kezeńde Qarýly Kúshterdiń jaýyngerlik ázirligi men daiyndyǵymen ainalysý barynsha oryndy dep esepteimiz", – dedi Rýslan Jaqsylyqov
Bul rette ministr 9 mamyr – Jeńis kúnine orai josparlanǵan barlyq is-sharalar júzege asyrylatynyn basa aitty. Barlyq ardagerlerdi quttyqtap, olarǵa aqshalai kómek kórsetiledi.
"Siz shatastyryp jatyrsyz. 7 mamyr – Qarýly kúshter kúni, 9 mamyr Jeńis kúni. Sherý Jeńis kúnine emes, Qarýly Kúshterdiń 30 jyldyǵyna arnalar edi. Siz aiyrmashylyqty salystyryńyz. Jeńis kúnine josparlanǵan sharalar ardagerlerimizge qurmet kórsetý bolyp tabylady. Olar jospar boiynsha júrip, ardagerlerge atqarýshy bilik tarapynan tólem jasalatyn bolady. Biz olardy qurmettep, quttyqtaimyz", – deidi Rýslan Jaqsylyqov
Eske salaiyq, 13 sáýirde Qazaqstan Qarýly Kúshteriniń qurylǵanyna 30 jyl tolýyna jáne 1941-1945 jyldardaǵy Uly Otan soǵysyndaǵy Jeńis kúnine arnalǵan áskeri parad josparlanbaǵany belgili boldy.
