Apelliatsiialyq sot Sultanbekovtiń adamgershilik minezdemesi men otbasylyq jaǵdaiyn jáne taǵy basqa jaqtaryn eskere kele osyndai úkim kesken.Qanat Sultanbekov Qazaqstan sotynda ázirge eń iri aiyppul arqalap, bostandyqqa shyǵyp otyr. Ol memleket qazynasyna 2 milliard 139 million 500 myń teńge tóleýdi moinyna aldy. Byltyr qarasha aiynda top-menedjer sot úkimimen 10 jylǵa qamalǵan bolatyn.
Ol Astana qalasy ákiminiń orynbasary bolǵan tusta, izraildik kásipkermen aýyz jalasqan. Sóitip, memlekettik tenderdi utyp bergeni úshin biznesmennen 178 million teńge para alypty. Al «Qazaqstan injiniringke» qyzmet aýystyrǵan soń, oraldyq zaýyttyń basshysymen jymdasyp, 286 milionǵa kenelgen. Keiin qarsy shaǵym túsirip, 1 milliard teńge aiyppul tólep beretinin málimdepti. Apelliatsiialyq sot onyń dáiekterin eskere kele, aiyppulyn eki eselep, ózin bosatý týraly úkim shyǵarǵan.
– Qylmystyq quqyq buzýshylyqty ashý men tergeý sharalaryna, qylmystyq árekettiń basqa da qatysýshylaryn anyqtaýǵa, buryn tergeýge belgisiz bolǵan qylmystyq quqyq buzýshylyqtar týraly derekterdi taýyp berýge belsendi atsalysqan.
Jalpy, jazany aiyppulmen óteý tájiribesi bizdiń sot júiesinde burynnan bar. Úkimetti basqarǵan Serik Ahmetov 17 million teńge ótese, 3 jyl buryn Tabiǵi monopoliialardy retteý komitetiniń burynǵy basshysy Murat Ospanov 1 milliard 101 million teńgeni óz qaltasynan shyǵardy. Sultanbekovpen birge sottalǵan Áskeri ókildikter ortalyǵynyń bastyǵy Muhtar Qarabekovtiń áieli úkimmen tipti kelispeidi. Aitýynsha, kúieýiniń esh kinási joq. Tergeýshiler ony moiyndatpaq bolypty. Óitkeni, qylmys boldy degen aralyqta ol Reseide júrgen eken. Al qylmysyn tergeýshiler qoldan jasaǵan deidi.
– Úsh ai tergeý abaqtysynda otyrdy. Aiyp oidan qurastyrylǵan. Zańsyzdyq pen qoldan jasalǵan dúnie kóp, – deidi M. Qarabekovtiń zaiyby Farida Qarabekova.
Jalpy, Sultanbekov isi boiynsha eks-sheneýniktiń ózinen bólek 8 adam sottalǵan. Onyń biri Izrail azamaty. Qalǵan 7 adam 3 jyldan 7 jylǵa deiin jaza arqalaǵan.
Al Almaty men Astanadan tańdap turyp 158 páter alýǵa bolatyn aqshany Qanat Sultanbekov óz qaltasynan shyǵaratyn boldy. Qazirdiń ózinde ol 100 million teńgeden astam qarajatty Qarjy ministrliginiń esepshotyna aýdaryp qoiypty. Qalǵan qaryzyn tez arada jabýy tiis. Osyndai aiyppulmen qutylý jolyn týystarynyń aitýynsha, Qarabekovke de usynǵan eken. Úkimge kelispegen olar endi kassatsiialyq sotqa júginbekshi.
https://dalanews.kz/33766
