Sebebi, bularǵa degen suranys joǵary. Endigi jerde pantymen emdelgendi qup kóretin týrister mundai shipajailarǵa jyl ony eki ai boiy kele alady. Suranystyń udaiy ósip jatqandyǵyn eskergen kásipkerler, eldiń pikirin eleýsiz qaldyrmaǵan.
Shyǵys Qazaqstandaǵy Qaton-Qaraǵai aýdany elimizdegi maral sharýashylyǵyn damytyp otyrǵan birden-bir ólke. Pantymen emdeitin ortalyqtardyń basym bóligi osy aýdanda ornalasqan. Osy kúnge deiin buǵy múiiziniń qanyna mamyr men shildeniń aralyǵynda ǵana shomylýǵa bolatyn. Bul týrister úshin tym az ýaqyt edi.
Osyny eskergen shipajai ieleri em izdep kelgen azamattardy qystyń kózi qyraýǵa qaramai qabyldap jatyr.
Qaton-Qaraǵaidaǵy osyndai ortalyqtyń iesi Názerke Asqarovanyń aitýynsha jazǵy maýsymda klienttiń kóptigine bailanysty emdelýshilerdiń kópshiligi qabyldaýǵa úlgermei qalady. Jazǵy demalysty bala-shaǵasyna arnaityndyqtan, pantamen emdelýge ýaqyt bóle almaidy. Al qysqy maýsym týrister úshin qolaily ýaqyt.
"Kúnniń sýyǵyna qaramai kelip jatqan týrister kóp. Eldiń túkpir-túkpirinen aǵylyp kelýde, tipti alys-jaqyn shetelden kelip jatyr. Kúni keshe Máskeýden bir top adam keldi. Olardyń Qaton-Qaraǵaiǵa qyzyǵýshylyǵy erekshe, mundaǵy tabiǵatqa tamsanyp júr", – deidi shipajai direktory.
Erekshe em izdep, at aryltyp kelgenderdiń qarasy endi qysy-jazy úzilmeiin dep tur. Barlyǵy da ózderine yńǵaily ýaqytta shipaly sý túsip, densaýlyǵyn túzeýge nietti. Aita ketelik maral múiiziniń sorpasy amin qyshqyldaryna bai. Búgingi tańda Qaton-Qaraǵaida 3500-den astam maral bar. Áitse de, bul kásiptiń mashaqaty da jetip artylady.
"Osy sebepti jazǵy maýsymmen shektelip qalmai, qysqa maýsymda da tabys tabýdy jón kórdik jáne soǵan laiyq jaǵdai jasaimyz. Servis durys bolsa, týrister qysqy ýaqytta da kóptep keledi", – deidi kásipkerler.
Qaton-Qaraǵaida shańǵy kýrorttary da kóptep ashylyp jatyr. Aita ketý kerek, aýdanda shańǵy tebý maýsymy biyl jyldaǵyǵa qaraǵanda erte bastaldy. Qazir taýǵa kúnine myńǵa jýyq týrist keledi. Endi olardyń qataryn maral múiiziniń qanyn izdep kelýshiler kóbeitkeli otyr.
