Qulsaryda sý tasqyny bolyp, turǵyndar úiinen, múlkinen airyldy. Tipti adam shyǵyny da tirkeldi. Qinalǵan Qulsary halqynyń talaby da bar, - dep habarlaidy Dalanews.kz.
Jergilikti basylymdar málimetine súiensek, Qulsaryda sý tasqynynan zardap shekken turǵyndar ortalyq alańǵa jinalǵan. Olar búlingen úileriniń sharshy metri úshin 400 myń teńgeden tólem talap etip otyr eken. Ondaǵan adam talaby oryndalǵansha, bul jerden ketpeitinderin de aitqan.
"Kópshiligi baspanalaryn tehnikalyq tekserýden ótkizip, qorytyndysyn alǵan. Olardyń arasynda úilerine mamandar kelmegender de bar. Qulsaryndyqtardyń taǵy bir talaby - baǵalaý máselesin bir apta ishinde sheship, sol merzimde shottarǵa aýdarý", - dep jazdy "Aq Jaiyq" basylymy.
Jinalǵandardyń biri Jazira Qulmuhanovaúsh balasymen týystarynyń úiinde turýdan sharshaǵanyn aitady. Ol bul máseleni tez arada sheshýdi talap etedi. Onyń sózinshe, Qulsarydan endi jańa úi ala almaidy, óitkeni ol turǵan qaladaǵy jańa shaǵynaýdandardyń birindegi barlyq úidi sý basqan.
Olarǵa jer telimderi úsh jyldyń ishinde igerý shartymen berilgeni belgili. Jinalǵandar arasynda sý tasqyny kelgenshe jańa úilerine birneshe kún ǵana turǵandar da boldy. Turǵyndardyń bári Toqaevqa júginsek, Qazaqstan Prezidenti janaiqaiymyzdy estip, bul máseleni jeke baqylaýyna alýy kerek dep otyr.
Taǵy bir turǵyn Tolqyn Qojahmetova 369 myń teńge kólemindegi bir ret beriletin materialdyq kómek esebinen sarai jaldap otyrǵanyn aitty. Alaida mundai jaǵdai qansha ýaqytqa sozylatyny belgisiz ekenine nalyp, máseleni tezirek sheshýdi surady.
"Uldy uiaǵa, qyzdy qiiaǵa qondyrdyq. Qartaiǵanda endi rahat ómir súremiz degende mynaý aiaqastynan... Endi qalai ómir súremiz dep basymyzdy qatyryp júrmiz! Munai ústinde otyrmyz ózimiz osy turǵanda. Turǵyn úi alańyna qarai 1 sharshy metrge 400 myń teńge tólensin. Úilerdi qalai salýdy jáne qaida turýdy ózimiz sheshemiz", - dedi Qojahmetova.
Turǵyndar aldyna aýdan ákimi Jumabek Qarajanov pen onyń orynbasarlary Gúlnafiz Aishýaqova men Nurbolat Sarmanov shyqty.
"Ákim baǵalaý 15 mamyrdan keiin shyǵady dep ýáde berdi, biraq buryn 2 mamyr degen edi. Biz budan bylai kúte almaimyz!" – dep aiqailady turǵyndar.
Qala basshylyǵy turǵyndarǵa baǵalaýshylar jaqyn arada baratynyn, baspana úshin barlyq ótemaqy tólenetinin aityp ýáde berdi. Jinalǵandar túngi saǵat 2-ler shamasynda taraǵan.
