Ózbekstanda basshylyq laýazymdardy atqaratyn jáne sol laýazymdarǵa rezervte turǵan tulǵalardyń sybailas jemqorlyqqa beiimdiligin tekserý tájiribesin engizý usynyldy. Mundai bastamany Sybailas jemqorlyqqa qarsy is-qimyl agenttiginiń basshysy Akmal Býrhanov qoldaǵan, dep habarlaidy Dalanews.kz Politik.uz-ǵa siltep.
«Bul memlekettik qyzmetke qatelesip nemese zańsyz baiý maqsatynda kirgen adamdardy anyqtaýǵa, sondai-aq memlekettik mekemelerge adal kadrlardy tańdaýǵa múmkindik beredi», — dedi agenttik basshysy.
«Adaldyqty tekserý» úshin arnaiy psihofiziologiialyq test pen poligraf qoldaný josparlanýda. Nátijesine qarai tártiptik sharalar qabyldanyp, tipti jumysqa qabyldaýdan bas tartý nemese qyzmettegi memlekettik qyzmetshilerdi jumystan shyǵarý múmkindigi qarastyrylady.
«Adaldyqty tekserý» — bul memlekettik qyzmetshilerdiń qundylyqtaryn, minez-qulqyn jáne jeke is-áreketterin taldaý arqyly olardy qyzmettik mindetterin oryndaý kezinde sybailas jemqorlyqqa ushyraý jáne múddeler qaqtyǵysy qaýpin anyqtaýǵa baǵyttalǵan keshendi júie ekeni aityldy.
Tekserýdiń eki ádisi talqylanýda: «maqsatty» jáne «tańdamaly».
Birinshisinde, barlyq memlekettik organ men uiymda jumysqa qabyldanar kezde kandidattyń adaldyq testi alynady. Ony Sybailas jemqorlyqqa qarsy is-qimyl agenttiginiń suranysy boiynsha Memlekettik qyzmetti damytý agenttiginiń basqarýshy personaldy baǵalaý ortalyǵy júrgizedi.
Ekinshi nusqada «tańdamaly» tekserý kózdelgen. Oǵan «sybailas jemqorlyq qaýpi joǵary» laýazymdardaǵy memlekettik qyzmetshiler, sondai-aq Sybailas jemqorlyqqa qarsy is-qimyl agenttigine shaǵym túsken tulǵalar ushyraidy.
