Ulttyq joba sheńberinde qonys aýdarýshylarǵa memlekettik qoldaýdyń mynadaı sharalary usynylady:
1) kóshýge arnalǵan sýbsıdıa – bir mezgilde otaǵasyna jáne otbasynyń árbir múshesine 70 AEK mólsherinde;
2) otbasy músheleriniń sanyna jáne eldi mekenge baılanysty 12 aı ishinde 15-ten 30 AEK-ke deıingi mólsherde turǵyn úı jaldaýǵa jáne komýnaldyq qyzmetterge aqy tóleýge aı saıynǵy sýbsıdıalaý;
3) qysqa merzimdi kásiptik oqytýǵa jiberý;
4) jumysqa ornalasýǵa nemese kásipkerlik bastamany damytýǵa járdemdesý.
Ótken jyly qonys aýdarǵandardyń ishinde 3 652 adam eńbekke jaramdy, olardyń 2 811-i turaqty jumysqa ornalastyrylǵan. Birjolǵy sýbsıdıalar 7 622 qatysýshyǵa tólendi, al 5 633 azamatqa turǵyn úı shyǵystary sýbsıdıalanady.
Budan basqa, óńiraralyq qonys aýdarýǵa járdem kórsetetin jumys berýshilerge turǵyn úımen qamtamasyz etilgen jáne keminde 2 jyl merzimge turaqty jumysqa qabyldanǵan árbir jumysker úshin 400 AEK mólsherinde jumysqa ornalasýǵa birjolǵy sýbsıdıa beriledi.
Eńbek tapshylyǵy bar óńirlerge qonys aýdarý múmkindigin paıdalanǵan qazaqstandyqtar olardyń ómirindegi oń ózgeristerdi atap ótti. Solardyń biri Nurbolat Mádıev. Ol Qyzylordan Qostanaı oblysyna kóshti.
– 2019 jyly men bolashaq áıelimmen birge Áýlıekól aýdanyna kóship keldim. Qazir aýdandyq aýrýhanada massajıst bolyp jumys isteımin. Jumyspen qamtý ortalyǵy arqyly jumysqa ornalastym. Men barlyq qoldaý sharalaryn aldym, barlyǵyna rızamyn, Mundaı baǵdarlamalar kóp bolsa jaqsy bolar edi, – deıdi qonys aýdarýshy.
Nurbolat Mádıev jubaıymen osynda kóship kelgennen keıin úılendi. Onyń jubaıy aýdandyq aýrýhanaǵa gınekolog bolyp jumysqa ornalasty. Jas otbasy qazir ekinshi sábıdi kútýde.
– Qandastar men qonys aýdarýshylardy qabyldaýdyń 2023 jylǵa arnalǵan óńirlik kvotasy 8 652 adamdy quraıdy, onyń 1,9 myńy qandastar úshin, al 6,7 myńy – qonys aýdarýshylar úshin kózdelgen.
Qazirgi ýaqytta mınıstrlik 2023-2027 jyldarǵa arnalǵan Kóshi-qon saıasatynyń tujyrymdamasyn qabyldady, ol iske asyrý úshin jumys oryndary qurylatyn jáne qoldanystaǵy bıznes-jobalar keńeıtiletin soltústik jáne ortalyq óńirlerge ishki qonys aýdarý tetigin qaıta qaraıdy.
Budan basqa, turaqty jumysqa ornalasqan azamattarǵa jańa turǵylyqty jeri boıynsha 4 mln teńgege deıingi mólsherde turǵyn úı satyp alýǵa qarjylaı kómek alýǵa múmkindik beretin utqyrlyq sertıfıkattaryn engizý múmkindigi qarastyrylýda. İske asyrylyp jatqan sharalar halyqty qonystandyrýdyń óńirishilik dısproporsıasy problemalaryn sheshýshi rólin atqarady, – dep atap ótti QR EHÁQM Kóshi-qon komıteti tóraǵasynyń m.a. İlıas Ispanov.
