Elbasymyz Nursultan Nazarbaevtyń «Bolashaqqa baǵdar: rýhani jańǵyrý» maqalasynda kóterilgen mindetterdi júzege asyrý maqsatynda iske asyp jatqan sharany Otyrar aýdanynda jyl saiyn ótkizý dástúrge ainalǵan. Ótken jyly ardagerler sansyz babtartardyń jatqan jeri Sairam aýdanyna saiahattaǵan bolatyn.
1-shi qazan halyqaralyq «Qarttar kúni» merekesine orai aýdan ákimdiginiń uiymdastyrýymen ótken sharaǵa aýdan ákimi Erlan Aitahanov qatysyp, tárbielik máni zor mundai bastama kelesi jyly da jalǵasyn tabatynyn jetkizdi.
«Táýelsiz elimizdiń búgingi jetistikteri, bolashaqqa tynysh ta, erkin jáne qaýipsiz ómir syilaǵan ardagerlerdiń eren eńbegimen, qajyrly jigeriniń arqasy ekeni anyq. Úlkendi syilaý, olarǵa qurmet kórsetý – ata-babadan kele jatqan saltymyz. Elbasymyz Nursultan Ábishuly Nazarbaev óziniń dástúrli Joldaýlarynda qaharman ardagerler, qazynaly qarttarymzdy eshqashanda nazardan tys qaldyrmaǵan. Qarttarǵa memleket tarapynan beriletin kómekter jyl saiyn artyp, arnaiy emdeý oryndarynda demalýǵa barynsha jaǵdai jasalynýda. Bul – táńirden kelgen táýelsizdiktiń syiy dep bilemiz», - degen aýdan ákimi elimizdiń baiandy bolashaǵy jolynda rýhani qundylyqtarymyzdy nasihattap júrgen qariialarymyzǵa amandyq tiledi.
Babadan qalǵan salttyń qalpyn buzbai urpaqtan-urpaqqa amanattap, qazynaly qarttarǵa syi-qurmet kórsetýden tanbai kele jatqan otyrarlyqtardyń bul ónegeli isteriniń máni tereńde. Óitkeni ǵumyrlarynyń eń qyzyqty da jarqyn jastyq shaqtaryn elimizdiń órkendeýi men keler urpaqtyń igiligine arnaǵan qazynaly qarttarymyzdyń qoǵamda alar orny bólek.
Sóz barysynda aýdandyq ardagerler keńesiniń tóraǵasy Myrzabai Óksikbaev ótken tarihymyzda el basqarǵan handardyń ózi úlken isti bastar aldynda abyz qariialardyń aq batasyn alyp, olarǵa qurmet kórsetýden bastaǵanyn aita kele, urpaq tárbiesine taǵylymy mol osyndai sharalardy uiymdastyrǵan aýdan ákimine shynaiy alǵysyn bildirdi.
Munan soń aýdan ónerpazdary qasietti dombyranyń kúmbirlegen únimen ardagerlerdiń kóńil-kúiin kóterip, ulttyq ánderdi áýelete shyrqady. Uiymdastyrýshylardyń yqylasy men shynaiy syi-qurmetine kóńilderi marqaiǵan qariialar bala kóńilmen saiahatqa attandy.
Esterińizge sala keteiik osydan 28 jyl buryn, iaǵni, 1990 jyly jeltoqsan aiynyń on tórtinshi juldyzynda Birikken ulttar uiymynyń Bas Assambleiasy 1 qazandy «Halyqaralyq qarttar kúni» dep jariialaǵan bolatyn. Sodan beri elimizde jyldan jylǵa «Qarttar kúni» dástúrli túrde atalyp ótýde.
Otyrar aýdany ákiminiń baspasóz qyzmeti
