Tarih tamyrynyń búlkili árbir urpaq júregimen teń soǵyp, sanada eriksiz syr sherter uly uǵym. Elbasy maqalasynda kóterilgen tarihymyzdyń jańǵyryqqa toly jeti qyrynan syr shertetin
"Otyrar dastany", "Kóne qumyranyń syry" animatsiialyq filmderi ótken jyly ǵana jaryqqa shyqqan bolatyn.
Respýblikalyq "Balapan" arnasy da atalǵan bastamaǵa qoldaý bildirip, kógildir arnadan keńinen nasihattap, san ǵasyrlyq tarihyn qoinaýyna búkken syrǵa toly ólke men mańyzy jóninde bala tilimen, óskeleń urpaq sanasyna sińirýge atsalysty.
Tarih jylnamasyn sanamalasaq, kelesi jyly alty aiǵa sozylǵan Otyrar shaiqasyna 800 jyl tolady. "Elý jylda el jańa" desek, san ǵasyr kóshin kórgen saiyn dala kóneniń eskirmes izi men tarih tańbasyn boiamasyz hálde pash etip turǵandai.
Qos animatsiialyq filmde de el men jerdi saqtap, qorǵap qalý jolyndaǵy janqiiarlyq erlik, jaýyzdyqpen kúres keńinen sýretteledi. Búgingi kúnde qanshama týristerdiń arnaiy baryp, kózben kórýge yntyq mekeniniń biri - tarihi qaqpa men kitaphana orny, betin arshysa túrli-túrli qysh synyqtary shyǵa keletin, tarihi jádirge bai ejelgi Otyrar jeri, otyzdan asa Farabiler men qanshama tulǵalardyń tabany tigen qyrtysty topyraqtar ekeni anyq. Elbasy maqalasymen jarasym tapqan týyndylardy jaryqqa shyǵarýǵa Otyrar aýdanynyń ákimdigi aianbai atsalysty. Nátijesinde, Otyrar ataýynyń máni men maǵynasy, tarih jalǵastyǵynyń uly izden alǵan bastaýy jóninde óskeleń urpaq ta tereń uǵyndy.
Árine, bul Elbasy bastamalaryn júzege asyrýdaǵy bir qadam ǵana. Aldaǵy ýaqytta da jastar boiyna patriottyq kúsh berer, tarihi máni zor jumystar jalǵasyn taba bermek.
Otyrar aýdany ákiminiń baspasóz qyzmeti
