تاريح تامىرىنىڭ بۇلكىلى ءاربىر ۇرپاق جۇرەگىمەن تەڭ سوعىپ، سانادا ەرىكسىز سىر شەرتەر ۇلى ۇعىم. ەلباسى ماقالاسىندا كوتەرىلگەن تاريحىمىزدىڭ جاڭعىرىققا تولى جەتى قىرىنان سىر شەرتەتىن
"وتىرار داستانى"، "كونە قۇمىرانىڭ سىرى" انيماسيالىق فيلمدەرى وتكەن جىلى عانا جارىققا شىققان بولاتىن.
رەسپۋبليكالىق "بالاپان" ارناسى دا اتالعان باستاماعا قولداۋ ءبىلدىرىپ، كوگىلدىر ارنادان كەڭىنەن ناسيحاتتاپ، سان عاسىرلىق تاريحىن قويناۋىنا بۇككەن سىرعا تولى ولكە مەن ماڭىزى جونىندە بالا تىلىمەن، وسكەلەڭ ۇرپاق ساناسىنا سىڭىرۋگە اتسالىستى.
تاريح جىلناماسىن سانامالاساق، كەلەسى جىلى التى ايعا سوزىلعان وتىرار شايقاسىنا 800 جىل تولادى. "ەلۋ جىلدا ەل جاڭا" دەسەك، سان عاسىر كوشىن كورگەن سايىن دالا كونەنىڭ ەسكىرمەس ءىزى مەن تاريح تاڭباسىن بوياماسىز حالدە پاش ەتىپ تۇرعانداي.
قوس انيماسيالىق فيلمدە دە ەل مەن جەردى ساقتاپ، قورعاپ قالۋ جولىنداعى جانقيارلىق ەرلىك، جاۋىزدىقپەن كۇرەس كەڭىنەن سۋرەتتەلەدى. بۇگىنگى كۇندە قانشاما تۋريستەردىڭ ارنايى بارىپ، كوزبەن كورۋگە ىنتىق مەكەنىنىڭ ءبىرى - تاريحي قاقپا مەن كىتاپحانا ورنى، بەتىن ارشىسا ءتۇرلى-تۇرلى قىش سىنىقتارى شىعا كەلەتىن، تاريحي جادىرگە باي ەجەلگى وتىرار جەرى، وتىزدان اسا فارابيلەر مەن قانشاما تۇلعالاردىڭ تابانى تيگەن قىرتىستى توپىراقتار ەكەنى انىق. ەلباسى ماقالاسىمەن جاراسىم تاپقان تۋىندىلاردى جارىققا شىعارۋعا وتىرار اۋدانىنىڭ اكىمدىگى ايانباي اتسالىستى. ناتيجەسىندە، وتىرار اتاۋىنىڭ ءمانى مەن ماعىناسى، تاريح جالعاستىعىنىڭ ۇلى ىزدەن العان باستاۋى جونىندە وسكەلەڭ ۇرپاق تا تەرەڭ ۇعىندى.
ارينە، بۇل ەلباسى باستامالارىن جۇزەگە اسىرۋداعى ءبىر قادام عانا. الداعى ۋاقىتتا دا جاستار بويىنا پاتريوتتىق كۇش بەرەر، تاريحي ءمانى زور جۇمىستار جالعاسىن تابا بەرمەك.
وتىرار اۋدانى اكىمىنىڭ باسپا ءسوز قىزمەتى
