Elimizde Qazaqstan Prezıdenti Qasym-Jomart Toqaev túbegeıli saıası reformalar bastady. Reformalardyń máni halyqqa, azamattarǵa tıesili memleket tetikterin qaıtaryp berý.
Halyqtyń basym kópshiligi bul reformalardy qoldap otyr.
Sonymen birge Memleket basshysy halyqqa, elge tıesili, azamattardyń enshisi bolyp tabylatyn Qazaqstannyń ekonomıkalyq ıgilikterin de qaıtaryp berý prosesin bastady.
Qazirdiń ózinde keıbir aktıvter memleketke qaıtaryla bastady. Bul da halyqtyń Prezıdentke degen senimin uıalatýda.
Korrýpsıaǵa qarsy kúres proteksıanyń ortasy, oırany bolyp alǵan at tóbelindeı toptyń halyqtan tartyp alǵan aktıvterin qaıtarýdan bastaldy.
"Kósh júre túzeledi" barlyq halyqtyq materıaldyq-ekonomıkalyq ıgilikterdiń memleketke qaıtatyn kúni de alys emes.
Saıası reformalardyń túp tamyry, Prezıdent jarıalaǵan Konstıtýsıalyq reforma. Ol reforma bastalyp ta ketti. Reformada halyq sheshimin kútip otyrǵan túıtkildi máseleler de bar.
Ol burynǵy memleket basshysy Nursultan Nazarbaevqa qatysty Konstıtýsıadaǵy baptar. Jobada Birinshi Prezıdenttiń quzireti jónindegi baptar tolyǵymen alynyp tastalǵan. Bul durys dep oılaımyn.
Prezıdent degenimiz memlekettik ınstıtýt. Sondyqtan, Konstıtýsıada Prezıdent ınstıtýtynyń ǵana quzyreti qaralýy kerek.
"Elbasy – Birinshi Prezıdent jónindegi" zańda kúshin joıýy kerek. Zaman ózgerip ketti. Qoǵamnyń suranysy basqa, azamattar tarıhı, áleýmettik ádilettilikti talap etip otyr. Geosaıası jaǵdaı óte kúrdeli, osyndaı aýmaly-tókpeli zamanda eldi uıystyratyn, memleketti biriktiretin amal izdeý kerek.
Búgin joǵarydaǵy másele halyqtyń berekesin qashyratyn, yzalandyratyn dıskýrsqa aınalyp barady. Tarıhı ádilettilik turǵysynan qaraıtyn bolsaq, Nursultan Ábishuly Nazarbaev Qazaqstan Táýelsizdiginiń bastapqy kezeńinde memlekettiń buǵanasynyń qataıýy úshin eren eńbek etti!
Shekarany shegendeý, Astanany Aqmolaǵa kóshirý, kúrdeli kezeńde elimizde turaqtylyqty saqtap turý. Myqty adamnyń ǵana qolynan keledi. Bul tarıhı shyndyq!
Degenmen ýaqyt óte kóptegen keleńsizdikterge de jol berdi. Januıasyna ıe bola almaı qaldy, halyqtyń ekonomıkalyq enshisin at tóbelindeı topqa úlestirip berdi.
Jeke basqa tabynýǵa da jol berildi. Halqy oısyrap jatqanda ózi, týystary záýlim saraılar saldy. Bul da anyq.
Jańa tarıhta búgingi Qazaqstannyń shekarasyn anyqtap ketken, Qazaqstannyń búgingi shekarasyna "sýbektnost bergen Á.Bókeıhanov, A.Baıtursynov, Á. Ermekov ekendigi belgili.
Bul shekarany qorǵap qalǵan J.Tashenov. Qazaqstannyń búgingi ekonomıkalyq kelbetine úles qosqan Q. Sátbaev, ınfraqurylymdy saldyrǵan Dinmuhamed Qonaev. Dinmuhamed Qonaevtyń búgingi kelbettegi Qazaqstannyń búkil qalalaryn saldyrǵan eńbegin qalaı baǵalamaımyz?
Olardy da basty qujatqa engizemiz be?
Bul aspekt Nursultan Nazarbaevtyń táýelsizdik kezeńindegi eńbegi elenbeýi kerek degen sóz emes.
Biraq biz ol kisiniń eńbekterin baǵalaı otyryp, "asyra siltep" jibersek, bolashaq urpaqqa qandaı úlgi beremiz?
Sondyqtan Konstıtýsıaǵa kelgende biz óte saq bolýymyz kerek. Konstıtýsıada tek adam, memleket, qoǵam, zań, moral postýlattary bolýy kerek.
Qasym-Jomart Toqaevtyń pármenimen Qazaqstanda júrgizilip otyrǵan saıası reformalar elimizdiń bolashaq damýynyń kontýryn syzyp qana qoımaı, elimizdiń konsolıdasıasynyń basty qundylyǵy bolýy kerek.
Saıası reformalar myna kúrdeli kezeńde daý-damaıǵa alyp keletin máselelerdi retteýi kerek. Osy turǵyda men Konstıtýsıany adam esimi, adam faktorynan ada jasaý kerek dep esepteımin.
Tazalyqty, adaldyqty osy reformadan jasaıyq! "Týra bıde týys joq". Nursultan Nazarbaevtyń tarıhtaǵy roline keletin bolsaq, sóz joq, ol kisi eren adam, úlken kisi.
Sondyqtan eńbegi de zor, qateligi de tereń, az bolmady. Tarıh ol kisige óziniń baǵasyn beredi.
