ەلىمىزدە قازاقستان پرەزيدەنتى قاسىم-جومارت توقايەۆ تۇبەگەيلى ساياسي رەفورمالار باستادى. رەفورمالاردىڭ ءمانى حالىققا، ازاماتتارعا تيەسىلى مەملەكەت تەتىكتەرىن قايتارىپ بەرۋ.
حالىقتىڭ باسىم كوپشىلىگى بۇل رەفورمالاردى قولداپ وتىر.
سونىمەن بىرگە مەملەكەت باسشىسى حالىققا، ەلگە تيەسىلى، ازاماتتاردىڭ ەنشىسى بولىپ تابىلاتىن قازاقستاننىڭ ەكونوميكالىق يگىلىكتەرىن دە قايتارىپ بەرۋ پروسەسسىن باستادى.
ءقازىردىڭ وزىندە كەيبىر اكتيۆتەر مەملەكەتكە قايتارىلا باستادى. بۇل دا حالىقتىڭ پرەزيدەنتكە دەگەن سەنىمىن ۇيالاتۋدا.
كوررۋپسياعا قارسى كۇرەس پروتەكسيانىڭ ورتاسى، ويرانى بولىپ العان ات توبەلىندەي توپتىڭ حالىقتان تارتىپ العان اكتيۆتەرىن قايتارۋدان باستالدى.
"كوش جۇرە تۇزەلەدى" بارلىق حالىقتىق ماتەريالدىق-ەكونوميكالىق يگىلىكتەردىڭ مەملەكەتكە قايتاتىن كۇنى دە الىس ەمەس.
ساياسي رەفورمالاردىڭ ءتۇپ تامىرى، پرەزيدەنت جاريالاعان كونستيتۋسيالىق رەفورما. ول رەفورما باستالىپ تا كەتتى. رەفورمادا حالىق شەشىمىن كۇتىپ وتىرعان تۇيتكىلدى ماسەلەلەر دە بار.
ول بۇرىنعى مەملەكەت باسشىسى نۇرسۇلتان نازاربايەۆقا قاتىستى كونستيتۋسياداعى باپتار. جوبادا ءبىرىنشى پرەزيدەنتتىڭ قۇزىرەتى جونىندەگى باپتار تولىعىمەن الىنىپ تاستالعان. بۇل دۇرىس دەپ ويلايمىن.
پرەزيدەنت دەگەنىمىز مەملەكەتتىك ينستيتۋت. سوندىقتان، كونستيتۋسيادا پرەزيدەنت ينستيتۋتىنىڭ عانا قۇزىرەتى قارالۋى كەرەك.
"ەلباسى – ءبىرىنشى پرەزيدەنت جونىندەگى" زاڭدا كۇشىن جويۋى كەرەك. زامان وزگەرىپ كەتتى. قوعامنىڭ سۇرانىسى باسقا، ازاماتتار تاريحي، الەۋمەتتىك ادىلەتتىلىكتى تالاپ ەتىپ وتىر. گەوساياسي جاعداي وتە كۇردەلى، وسىنداي اۋمالى-توكپەلى زاماندا ەلدى ۇيىستىراتىن، مەملەكەتتى بىرىكتىرەتىن امال ىزدەۋ كەرەك.
بۇگىن جوعارىداعى ماسەلە حالىقتىڭ بەرەكەسىن قاشىراتىن، ىزالاندىراتىن ديسكۋرسقا اينالىپ بارادى. تاريحي ادىلەتتىلىك تۇرعىسىنان قارايتىن بولساق، نۇرسۇلتان ءابىش ۇلى نازاربايەۆ قازاقستان تاۋەلسىزدىگىنىڭ باستاپقى كەزەڭىندە مەملەكەتتىڭ بۇعاناسىنىڭ قاتايۋى ءۇشىن ەرەن ەڭبەك ەتتى!
شەكارانى شەگەندەۋ، استانانى اقمولاعا كوشىرۋ، كۇردەلى كەزەڭدە ەلىمىزدە تۇراقتىلىقتى ساقتاپ تۇرۋ. مىقتى ادامنىڭ عانا قولىنان كەلەدى. بۇل تاريحي شىندىق!
دەگەنمەن ۋاقىت وتە كوپتەگەن كەلەڭسىزدىكتەرگە دە جول بەردى. جانۇياسىنا يە بولا الماي قالدى، حالىقتىڭ ەكونوميكالىق ەنشىسىن ات توبەلىندەي توپقا ۇلەستىرىپ بەردى.
جەكە باسقا تابىنۋعا دا جول بەرىلدى. حالقى ويسىراپ جاتقاندا ءوزى، تۋىستارى ءزاۋلىم سارايلار سالدى. بۇل دا انىق.
جاڭا تاريحتا بۇگىنگى قازاقستاننىڭ شەكاراسىن انىقتاپ كەتكەن، قازاقستاننىڭ بۇگىنگى شەكاراسىنا "سۋبەكتنوست" بەرگەن ءا.بوكەيحانوۆ، ا.بايتۇرسىنوۆ، ءا. ەرمەكوۆ ەكەندىگى بەلگىلى.
بۇل شەكارانى قورعاپ قالعان ج.تاشەنوۆ. قازاقستاننىڭ بۇگىنگى ەكونوميكالىق كەلبەتىنە ۇلەس قوسقان ق. ساتبايەۆ، ينفراقۇرىلىمدى سالدىرعان دىنمۇحامەد قونايەۆ. دىنمۇحامەد قونايەۆتىڭ بۇگىنگى كەلبەتتەگى قازاقستاننىڭ بۇكىل قالالارىن سالدىرعان ەڭبەگىن قالاي باعالامايمىز؟
ولاردى دا باستى قۇجاتقا ەنگىزەمىز بە؟
بۇل اسپەكت نۇرسۇلتان نازاربايەۆتىڭ تاۋەلسىزدىك كەزەڭىندەگى ەڭبەگى ەلەنبەۋى كەرەك دەگەن ءسوز ەمەس.
ءبىراق ءبىز ول كىسىنىڭ ەڭبەكتەرىن باعالاي وتىرىپ، "اسىرا سىلتەپ" جىبەرسەك، بولاشاق ۇرپاققا قانداي ۇلگى بەرەمىز؟
سوندىقتان كونستيتۋسياعا كەلگەندە ءبىز وتە ساق بولۋىمىز كەرەك. كونستيتۋسيادا تەك ادام، مەملەكەت، قوعام، زاڭ، مورال پوستۋلاتتارى بولۋى كەرەك.
قاسىم-جومارت توقايەۆتىڭ پارمەنىمەن قازاقستاندا جۇرگىزىلىپ وتىرعان ساياسي رەفورمالار ەلىمىزدىڭ بولاشاق دامۋىنىڭ كونتۋرىن سىزىپ قانا قويماي، ەلىمىزدىڭ كونسوليداسياسىنىڭ باستى قۇندىلىعى بولۋى كەرەك.
ساياسي رەفورمالار مىنا كۇردەلى كەزەڭدە داۋ-دامايعا الىپ كەلەتىن ماسەلەلەردى رەتتەۋى كەرەك. وسى تۇرعىدا مەن كونستيتۋسيانى ادام ەسىمى، ادام فاكتورىنان ادا جاساۋ كەرەك دەپ ەسەپتەيمىن.
تازالىقتى، ادالدىقتى وسى رەفورمادان جاسايىق! "تۋرا بيدە تۋىس جوق". نۇرسۇلتان نازاربايەۆتىڭ تاريحتاعى رولىنە كەلەتىن بولساق، ءسوز جوق، ول كىسى ەرەن ادام، ۇلكەن كىسى.
سوندىقتان ەڭبەگى دە زور، قاتەلىگى دە تەرەڭ، از بولمادى. تاريح ول كىسىگە ءوزىنىڭ باعاسىن بەرەدى.
