Aqmola oblysynda bir otbasynyń úsh múshesi óltirilgen is boiynsha kúdiktiniń jaǵdaiy belgili boldy, dep habarlaidy Dala News.
«Qazir bul is boiynsha biz de tergeýdi Qylmystyq kodekstiń 99-baby 3-bóligi boiynsha aiaqtap jatyrmyz. Kúdikti qazir statsionarlyq sot-psihiatriialyq saraptamada. Ol reaktivti psihoz kúiinde», – dedi IIM vitse-ministri Sanjar Adilov Senat kýlýarynda.
Oqiǵa 2026 jyldyń naýryz aiynyń basynda Aqmola oblysy Arshaly aýdanyndaǵy Jibek joly aýylynda bolǵan. Bir otbasynyń úsh múshesi qaza tapqan.
Aldyn ala málimet boiynsha, kúdikti marqumdardyń týysy. Ol qylmys jasalǵannan keiin jedel túrde ustalyp, ýaqytsha ustaý izoliatoryna qamalǵan.
Qazirgi tańda kúdiktige qatysty sot-psihiatriialyq saraptama júrgizilip jatyr, tergeý aiaqtalýǵa jaqyn.
