Birneshe jyl buryn Otanyna opasyzdyq jasady degen aiyppen 10 jylǵa sottalǵan belgili qytaitanýshy Konstantin Syroejkin bostandyqqa shyqty, - dep habarlaidy Dalanews.kz.
Syroejkinniń bostandyqqa shyqqanyn saiasattanýshy Marat Shibutov jariialady.
"Konstantin Lvovich Syroejkin bostandyqqa shyqty. 5 jyl jazasyn ótedi", - dep jazdy ol.
Syroejkinniń sottalǵany týraly aqparat 2019 jyly aldymen áleýmettik jelide jariialanyp, artynsha bul aqpartty Almaty qalalyq soty rastaǵan bolatyn.
"Aqpanda qytaitanýshy, Qytaidy jete biletin maman Konstantin Syroejkin qamaýǵa alynǵan edi. Oǵan "Otanyna opasyzdyq jasady" degen aiyp taǵyldy. Sot protsesi jabyq ótti. Syroejkindi 10 jylǵa bas bostandyǵynan aiyrý, jazasyn arnaiy qatań rejimdegi abaqtyda ótkizý, odan soń azamattyǵynan aiyrý jazasy kesilgeni belgili boldy", - dep jazdy sol kezde qoǵam belsendisi Ǵalym Aqeleýov.
Onyń aitýynsha, Syroejkin kinásin moiyndamaǵan jáne apelliatsiialyq shaǵym berýden bas tartqan.
Saiasattanýshy Andrei Chebotarev te qytaitanýshynyń qamalǵanyna ókinish bildirdi.
Keiinirek bul jaitqa qatysty Ulttyq qaýipsizdik komiteti de málimdeme jasady.
"2019 jyly 7 qazanda Almaty qalasynyń qylmystyq ister jónindegi mamandandyrylǵan aýdanaralyq soty 1956 jyly týylǵan QR azamaty Konstantin Lvovich Syroejkindi QR Qylmystyq kodeksiniń 175-baby 1-bóligi, iaǵni "Otanǵa opasyzdyq jasaý" boiynsha kináli dep taýyp, ony 10 jylǵa bas bostandyǵynan aiyrdy", - dedi QR UQK baspasóz qyzmeti ókilderi.
Sot úkimi shyqqan kezde Syroejkin bostandyqqa shyqqannan keiin Qazaqstannan qýylyp, bes jylǵa deiin elge oralýyna tyiym salynatyny týraly da aqparat tarady.
