Túrkistan oblysy ákimi apparatynyń aýmaqtyq qorǵanys qyzmetiniń basshysy Babai Aldabergenovtiń aitýynsha, bul oqý-jattyǵý jiyny oblys ákiminiń qaýlysymen kestege sáikes ótýde.
– Oqý-jattyǵý jiynyna buryn áskeri boryshyn ótegen azamattar shaqyryldy. Maqsat – olardyń fizikalyq jáne áskeri-saptyq daiyndyǵyn tekserý jáne kúsheitý. Árine on, jiyrma jyl burynǵy úirengen nárselerdi qaita eske túsirý, jas kezdegidei tapsyrmany jedel oryndaý qiyn. Biraq bir aptanyń ózinde jigitter jónge kelip qaldy. Otanymyzdy qorǵaýǵa árbirimiz daiyn bolýymyz kerek, – deidi ol.
Oqý-jattyǵý jiyny barysynda azamattar áskeri taktikalardy qaita pysyqtap, qarý qoldaný mashyqtaryn eske túsirdi. Sporttyq saiystardan synǵa túsip, fizikalyq áleýetterin kúsheitti. Aýmaqty, nysandardy qorǵaý, áskeri taktika boiynsha bilimderin jetildirdi. Jattyǵý 22 sáýirde aiaqtalady.
