- Qostanaida qai ýaqyttan beri turyp jatyrsyz?
- Men Shymkentte týǵanmyn. Ata-anam sonda. Qostanaida 2020 jyldan bastap turyp jatyrmyn. Onyń aldynda kelip-ketip júrgenmin. Sol kezde 9-synyptan keiin Qostanai qalalyq avtomobil kolledjine túsýdi josparladym. Óitkeni jyl saiyn Qostanaiǵa demalys kezinde týystaryma demalýǵa keletinmin. Týystarym shamamen 1990 jyldan beri osynda turady.
- Sonda ońtústikten soltústikke kóshýińizge týystaryńyz sebepker boldy ma?
- Oqýǵa Qostanaiǵa kelýime ákem sebepshi boldy. Menen «Qandai mamandyqqa qyzyǵasyń?» dep surady. Kólikke qyzyǵamyn dedim. Oqý ornyn «Qostanaiǵa baryp qara» dedi. Sosyn osynda Shymkentten arnaiy kelip, oqý oryndarymen tanysyp, kólik slesari mamandyǵyna oqýǵa tústim.
Ákem júk kóliginiń júrgizýshisi. Jumys babymen Qostanaiǵa kelip turady. Ońtústikten oqýǵa kelgender negizinen jataqhanada turady. Biraq maǵan ákem oqýǵa túspes buryn osy jaqtan úi alyp bergen. Ol maǵan «Shymkentte júrseń, oqymaisyń» dedi. Sosyn Qostanaiǵa jiberdi. Men de Shymkentten ketkim keldi. Basqa qala kórip, jer aýystyryp, bilim deńgeiimdi ósirip degendei.
- Qostanaidaǵy bilim berý deńgeiine kóńilińiz tola ma?
- Qostanaida bilim berý shamaly joǵarylaý eken. Adamnyń eńbegin baǵalaidy. Kezinde mektepte qatty oqymaǵanmyn. Biraq úsh jyl boldy úzdik stýdentpin, joǵary shákirtaqy alamyn.
- Dos tabý, jergilikti halyqpen til tabysýda qiyndyqtar boldy ma?
- Maǵan oryssha sóileý shamaly qiyn boldy. Qazir de oryssha emes, qazaqsha sóileimin. Qazaq balalarymen jaqsy til tabysyp kettim. Olar menimen qazaqsha sóilesýge tyrysady.
- Jańa bir sózińizde «eńbek baǵalanady» dep aityp qaldyńyz. Soǵan qaraǵanda qosymsha jumys isteisiz be?
- Ai saiyn jalaqy alatyn jumys emes. Oqyp jatqan mamandyǵym tehnika, avtokólik salasy bolǵandyqtan osy Qostanaidaǵy Allur avtoóndirisine jii baryp turamyn. Elimizdegi aldyńǵy qatarly avtoóndiristeriniń biri dep aitýǵa ábden bolady. Avtozaýyt qazir qurastyryp shyǵarady ǵoi, aldaǵy jyldarda avtobólshekterdi ózimizde óndirse degen usynysym bar, oǵan kontsernniń áleýeti jetedi.
- Sizdiń mamandyǵyńyz tehnika salasy. Jalpy qoǵamda ulty qazaq tehnika mamandaryna senbeitinder kóp. Soǵan qarap qazaqtyń qolynan avto-injenerlik kelmei me degen oi keledi?
- Iá, qoǵam bolǵan soń túrli adam, túrli ustanym bolatyny zańdy ǵoi. Biraq qazaqtyń qolynan is kelmeidi degenge óz basym kelispeimin! Qazir, Qudaiǵa shúkir, qolynan nebir keremetter keletin jastar kóp. Sondai jastar erteńgi el bolashaǵy bolary sózsiz!
- Alda qandai josparyńyz bar?
- Endigi jospar – kolledjdi bitirip, jumysqa ornalasyp, joǵary oqý ornyna túsý.
- Suqbatyńyzǵa rahmet! Armanyńyz oryndalsyn!
