- قوستانايدا قاي ۋاقىتتان بەرى تۇرىپ جاتىرسىز؟
- مەن شىمكەنتتە تۋعانمىن. اتا-انام سوندا. قوستانايدا 2020 جىلدان باستاپ تۇرىپ جاتىرمىن. ونىڭ الدىندا كەلىپ-كەتىپ جۇرگەنمىن. سول كەزدە 9-سىنىپتان كەيىن قوستاناي قالالىق اۆتوموبيل كوللەدجىنە ءتۇسۋدى جوسپارلادىم. ويتكەنى جىل سايىن قوستانايعا دەمالىس كەزىندە تۋىستارىما دەمالۋعا كەلەتىنمىن. تۋىستارىم شامامەن 1990 جىلدان بەرى وسىندا تۇرادى.
- سوندا وڭتۇستىكتەن سولتۇستىككە كوشۋىڭىزگە تۋىستارىڭىز سەبەپكەر بولدى ما؟
- وقۋعا قوستانايعا كەلۋىمە اكەم سەبەپشى بولدى. مەنەن «قانداي ماماندىققا قىزىعاسىڭ؟» دەپ سۇرادى. كولىككە قىزىعامىن دەدىم. وقۋ ورنىن «قوستانايعا بارىپ قارا» دەدى. سوسىن وسىندا شىمكەنتتەن ارنايى كەلىپ، وقۋ ورىندارىمەن تانىسىپ، كولىك سلەسارى ماماندىعىنا وقۋعا ءتۇستىم.
اكەم جۇك كولىگىنىڭ جۇرگىزۋشىسى. جۇمىس بابىمەن قوستانايعا كەلىپ تۇرادى. وڭتۇستىكتەن وقۋعا كەلگەندەر نەگىزىنەن جاتاقحانادا تۇرادى. ءبىراق ماعان اكەم وقۋعا تۇسپەس بۇرىن وسى جاقتان ءۇي الىپ بەرگەن. ول ماعان «شىمكەنتتە جۇرسەڭ، وقىمايسىڭ» دەدى. سوسىن قوستانايعا جىبەردى. مەن دە شىمكەنتتەن كەتكىم كەلدى. باسقا قالا كورىپ، جەر اۋىستىرىپ، ءبىلىم دەڭگەيىمدى ءوسىرىپ دەگەندەي.
- قوستانايداعى ءبىلىم بەرۋ دەڭگەيىنە كوڭىلىڭىز تولا ما؟
- قوستانايدا ءبىلىم بەرۋ شامالى جوعارىلاۋ ەكەن. ادامنىڭ ەڭبەگىن باعالايدى. كەزىندە مەكتەپتە قاتتى وقىماعانمىن. ءبىراق ءۇش جىل بولدى ۇزدىك ستۋدەنتپىن، جوعارى شاكىرتاقى الامىن.
- دوس تابۋ، جەرگىلىكتى حالىقپەن ءتىل تابىسۋدا قيىندىقتار بولدى ما؟
- ماعان ورىسشا سويلەۋ شامالى قيىن بولدى. ءقازىر دە ورىسشا ەمەس، قازاقشا سويلەيمىن. قازاق بالالارىمەن جاقسى ءتىل تابىسىپ كەتتىم. ولار مەنىمەن قازاقشا سويلەسۋگە تىرىسادى.
- جاڭا ءبىر سوزىڭىزدە «ەڭبەك باعالانادى» دەپ ايتىپ قالدىڭىز. سوعان قاراعاندا قوسىمشا جۇمىس ىستەيسىز بە؟
- اي سايىن جالاقى الاتىن جۇمىس ەمەس. وقىپ جاتقان ماماندىعىم تەحنيكا، اۆتوكولىك سالاسى بولعاندىقتان وسى قوستانايداعى Allur اۆتووندىرىسىنە ءجيى بارىپ تۇرامىن. ەلىمىزدەگى الدىڭعى قاتارلى اۆتووندىرىستەرىنىڭ ءبىرى دەپ ايتۋعا ابدەن بولادى. اۆتوزاۋىت ءقازىر قۇراستىرىپ شىعارادى عوي، الداعى جىلداردا اۆتوبولشەكتەردى وزىمىزدە وندىرسە دەگەن ۇسىنىسىم بار، وعان كونسەرننىڭ الەۋەتى جەتەدى.
- ءسىزدىڭ ماماندىعىڭىز تەحنيكا سالاسى. جالپى قوعامدا ۇلتى قازاق تەحنيكا ماماندارىنا سەنبەيتىندەر كوپ. سوعان قاراپ قازاقتىڭ قولىنان اۆتو-ينجەنەرلىك كەلمەي مە دەگەن وي كەلەدى؟
- ءيا، قوعام بولعان سوڭ ءتۇرلى ادام، ءتۇرلى ۇستانىم بولاتىنى زاڭدى عوي. ءبىراق قازاقتىڭ قولىنان ءىس كەلمەيدى دەگەنگە ءوز باسىم كەلىسپەيمىن! ءقازىر، قۇدايعا شۇكىر، قولىنان نەبىر كەرەمەتتەر كەلەتىن جاستار كوپ. سونداي جاستار ەرتەڭگى ەل بولاشاعى بولارى ءسوزسىز!
- الدا قانداي جوسپارىڭىز بار؟
- ەندىگى جوسپار – كوللەدجدى ءبىتىرىپ، جۇمىسقا ورنالاسىپ، جوعارى وقۋ ورنىنا ءتۇسۋ.
- سۇقباتىڭىزعا راحمەت! ارمانىڭىز ورىندالسىن!
