Óskemende «Jarqyl-2024» áskeri-patriottyq oiyndary ótti. Oǵan qalalyq mektepterden barlyǵy 400-ge jýyq bala qatysty.
Óskemende dástúrli túrde jylda ótetin áskeri-sporttyq oiyn árdaiym qala mańyndaǵy taý bókterinde uiymdastyrylady, dep habarlaidy Dalanews.kz tilshisi.
Biraq jylda jańa stsenarimen órbidi. Biyl oqýshylar otandyq áskerilerge qarý men as-aýqat jetkizýshi kólikterge tosynnan jasalǵan shabýyl kezinde jaýǵa tótep berdi.
Jastar kúsh, eptilik jáne tapqyrlyq jaǵynan synǵa tústi. Al olarǵa Aýǵanstandaǵy soǵys ardagerleri qoǵamdyq birlestiginiń tálimgerleri kómektesti.
- «Jarqyl\Zarnitsa» oiyndary qalada qansha jyldan beri dástúrli túrde ótikizilip keledi. Bul áskeri-patriottyq oiyndar oqýshylardyń boiynda otansúigishtik sezimdi qalyptastyrady. Sondai-aq, bul shara QR Qraýly kúshteriniń imidjin kóterip, jastar arasynda áskeri qyzmetti nasihattaýǵa baǵyttalǵan. Jalpy «Jarqyl\Zarnitsa» oiyndary úsh kezeńnen turady. Búgin sońǵy taktikalyq oiyndar ótedi, bunda jastar urys kezinde qalai áreket etý, qalai sheshim qabyldaý kerektigin úirenedi. Qaladaǵy 41 mekteptiń áskeri klýbtarynan barlyǵy 400 bala qatysty. Ár komandada 8 baladan, - deidi «Jastar» resýrstyq ortalyǵynyń direktory Baqytjan Erbolqyzy.
Uldar men qyzdar ózderin birneshe saǵat barlaýshylar, taý atqyshtary jáne minometshiler rólinde boldy. Orman, taý men tasqa qaramastan oiyn qatysýshylary erik-jigerdiń arqasynda ózderine qoiylǵan mindetti múltiksiz oryndap, tapsyrmany durys oryndap shyqty.
- Bul jarys barysynda bizdiń elge basqa memleketter shabýyl jasaǵan ýaqytta qalai áreket etý kerektigin bildik. Urystar taý arasynda bolǵandyqtan aldyn alý sharalary, qandai tehnikany qoldaný, qandai taktikany paidalaný kerektigin úirendik. Bizdiń komanda taý ústinen barlaýshy snaiperler rólinde boldy. Taý etegindegi shabýyldaýshy topqa aqparat berip otyrdyq. Birlesken jumys arqyly jaýdyń qolyna túsken qarý-jaraq pen azyq-túlik tielgen tehnikalardy qaitaryp aldyq, - deidi №46 mektep oqýshysy Bekzat Jeksenbaev.
Oiyn qorytyndysy boiynsha kelesi komandalar jeńimpaz atandy:
1-oryn – «Alash» komandasy
2-oryn – «Birlik» komandasy
3-oryn – «Aibyn» komandasy
Jeńimpaz komandalarǵa júlde retinde mekteptegi alǵashqy áskeri daiyndyq synyptaryna qajetti qural-jabdyqtar tartý etildi.
