Óskemen qalasy prokýratýrasy bóliminiń prokýrory V.B. Pan 20 táýlikke qamaýǵa alynyp ári jumysynan bosatyldy, dep habarlaidy Dalanews.kz.
Shyǵys Qazaqstan oblysynyń prokýratýrasy habarlaǵandai, quqyq qorǵaý organyn bedelden túsiretin teris qylyq jasaǵany úshin Óskemen qalasy prokýratýrasy bóliminiń prokýrory V.B. Pan "Quqyq qorǵaý qyzmeti týraly" QR Zańyna sáikes prokýratýra organdarynan bosatylyp, "1-synypty zańger" sheninen aiyryldy.
"2025 jylǵy 3 qazandaǵy Ákimshilik quqyq buzýshylyq jónindegi mamandandyrylǵan sottyń qaýlysymen V.B. Pan ÁQBtK-niń 608-baby 3-bóliginde kózdelgen ákimshilik quqyq buzýshylyqty jasaǵany úshin kináli dep tanylyp, 20 táýlikke ákimshilik qamaýǵa alyndy jáne 7 jyl merzimge kólik quralyn basqarý quqyǵynan aiyryldy", delingen prokýratýra habarlamasynda.
Aita ketsek, aldynda jelide ShQO-da bir prokýror kóligimen elektr baǵanyna soǵylyp, oqiǵa ornynan izin sýytpaq bolǵany týraly aqparat jariia bolǵan. Al tekserý kezinde onyń qanynan alkogol men marihýana tabylǵan kórinedi. Resmi organ túsiniktemesinde bul jaǵy naqtylanbaidy.
Buǵan deiin áleýmettik jelide Almatydaǵy tergeý izoliatorynda eks-sýdianyń jan tapsyrǵany týraly aqparat taraǵan.
