«Rýhani jańǵyrý» óńirlik ortalyǵynyń uiymdastyrýymen ótken kezdesýge Jarma aýdanyndaǵy «Shalabai» JShS-niń bas direktory Qýanysh Súleimenov, aqyn, «Serper» respýblikalyq júldesiniń iegeri Erjan Jumabekov, sýretshi, Óskemen qalasyndaǵy «Perfomance» art-stýdiiasynyń jetekshisi Olga Chavkina qatysyp, jastar saýaldaryna jaýap berip, oilarymen bólisti. Aita ketsek, úsh jyl qatarynan ótkizilip keletin respýblikalyq saiyqqa shyǵysqazaqstandyqtar joǵary belsendilikpen qatysyp, jeńimpazdar tiziminde kórinip keledi. Ótken jyldyń ózinde baiqaýǵa 274 oblys turǵyny qatysyp, jalpyhalyqtyq daýys berý nátijesinde úsheýi jeńiske jetti.
Interaktivtik kezdesýge qatysqan oblys turǵyndary men jastary joǵary qyzýǵyshylyq tanytyp, kezdesý qonaqtaryna óz salalarynda qalai úzdik atanyp, jeńiske jetý joldary men onyń qupiialary týraly saýaldaryn joldady.
– Búgingi jastarda múmkindikter qatary óte kóp, olar mobildi, iaǵni kez kelgen salany meńgerip, jeńiske jete alady. Tek qana alǵa qoiǵan aiqyn maqsat pen joǵary eńbeksúigishtik kerek, – deidi kezdesý spikeri «Shalabai» JShS-niń bas direktory Qýanysh Súleimenov.
Búginde Qýanysh Serikqazyuly elimizdegi iri kásiporyn basshysy, metsenat. Jarma aýdanynda mektep direktory bolyp júrip, aýylsharýashylyq salasyna bet turǵan kásipkerdiń ózi aityp ótkendei, ár adam ózine jaqyn jáne týǵan jerine paidasy bar ispen ainalysý kerek. Sharýa basshysynyń alǵa qoiǵan jospary da kóp. Onyń biri – TMD elderinde «Qazaqtyń aq bas» brendin bekitip, asyl tuqymdy mal sanyn arttyrý.
[caption id="attachment_52598" align="alignright" width="247"]
Al, kóptegen tanymal ánderdiń avtory, aqyn Erjan Jumabek tyńdarman jastarǵa rýhani tárbie jaǵynan úlken motivatsiia berdi.
– Adamnyń ómirdegi jetistigi otbasy men qorshaǵan ortasyna bailanysty. Sondyqtan balalarymyzǵa sanaly tárbie berip, ata dástúri men saltyna baýlýymyz – úlken istiń bastaýy, – deidi aqyn. Sonymen qatar, kezdesý barysynda oblys jastary Erjan Jumabekke shyǵysqazaqstandyq jastardyń gimnin jazýdy usyndy.
Aýdandardan tikelei bailanysqa qosylǵan jastar qaýymy sýretshi Olga Chavkinaǵa da shyǵarmashylyqqa qalai kelip, qoǵamdyq ómirdegi belsendiligi týraly saýaldaryn qoidy. Óskemen qalasynda beineleý óneri stýdiiasynyń jetekshisi búgingi tańda jastardy da shyǵarmashylyqqa baýlyp keledi.
– Jastar ár minýttyń qadirin bilip, únemi izdeniste bolsa, kóptegen paidaly bastamanyń janynan tabylady, - deidi jas talant iesi.
Aita ketsek, atalmysh kezdesýler aldaǵy ýaqytta da jalǵasyn tabatyn bolady.
