Týva Respýblikasynyń Qyzyl qalasynda joǵalyp ketken eki 12 jastaǵy qyzdy izdeý jumystary jetinshi táýlikke jalǵasyp jatyr. Amina men Ailana 1 shilde kúni keshki ýaqytta serýendeýge shyǵyp, sol kúii úiine oralmaǵan. Qazir bul oqiǵaǵa qatysty birneshe nusqa qarastyrylyp jatyr. Sonyń ishinde qyzdardyń sýǵa batyp ketýi de, olardyń qylmystyq árekettiń qurbany bolýy da joqqa shyǵarylmaidy, dep habarlaidy dalanews.kz.
Aif.ru basylymyna suhbat bergen kriminalist Mihail Ignatov tergeý barysynda anyqtalǵan keibir derekter istiń kriminaldyq sipaty bolýy múmkin ekenin aitty. Onyń sózinshe, joǵalǵan qyzdardyń telefondary men aiaq kiimderiniń tabylý jaǵdaiy kúdik týdyrady.
Belgili bolǵandai, jedel-izdestirý sharalary kezinde beinebaqylaý kameralarynyń jazbalary tekserilgen. Kadrlarda eki qyzdyń Enisei ózeni boiyndaǵy bóget jaqqa qarai ketip bara jatqany kórinedi. Keiin ózen jaǵasynan olardyń uialy telefondary tabylǵan. Quqyq qorǵaý organdarynyń málimetinshe, telefondar uqypty túrde jinalyp, óshirilgen kúide jatqan. Bir qyzyǵy, qurylǵylardyń qýaty áli taýsylmaǵan bolǵan.
Keiinirek ózennen qyzdardyń aiaq kiimderi de tabyldy. Aldymen bir qyzdyń sandaly telefondar tabylǵan jerden shamamen 400 metr qashyqtyqtan shyqqan. Odan soń ekinshi qyzdyń aiaq kiimi Enisei aǵysy boiymen 22 shaqyrym tómen jerden tabylǵan. Bul zattardy joǵalǵan balalardyń týystary tanyǵan.
Osy derekterden keiin Resei Tergeý komiteti Qylmystyq kodekstiń 105-baby 2-bóligi boiynsha qylmystyq is qozǵady. Negizgi nusqalardyń biri – qyzdardyń sýǵa ketýi. Alaida týystary balalardyń urlanýy múmkin ekenin aityp otyr.
Bul nusqany jergilikti turǵyndar arasynda taraǵan taǵy bir jaǵdai kúsheite túsken. Jergilikti kóripkel qyzdar belgili bir úide ustalýy múmkin ekenin aitqan. Osydan keiin ashýǵa býlyqqan turǵyndar sol úige basyp kirmek bolǵan. Oqiǵa ornyna jetken quqyq qorǵaý qyzmetkerleri ǵimaratty teksergenimen, joǵalǵan qyzdardyń izi tabylmaǵan.
Kriminalist Mihail Ignatovtyń aitýynsha, telefondardyń óshirilgen kúide uqypty jatýy jáne aiaq kiimderdiń ár jerden tabylýy qarapaiym oqiǵaǵa uqsamaidy.
«Óshirilgen telefondar men tabylǵan aiaq kiimder bul iste qylmystyq iz bolýy múmkin ekenin kórsetedi. Ainalany muqiiat tekserý kerek: olar qaida barýy múmkin, olardy qai jaqqa alyp ketýi yqtimal? Eger bul shynymen qylmystyq nusqa bolsa, onda munyń artynda qyzdardy urlap, bir jerde ustap otyrǵan adam bolýy múmkin. Skopinsk maniagy oqiǵasyndaǵydai jaǵdai bolýy da ǵajap emes», – dedi sarapshy.
Sarapshy atap ótken Skopinsk maniagy – Viktor Mohov 2000 jyly eki kámeletke tolmaǵan qyzdy urlap, olardy jertólede birneshe jyl boiy qamaýda ustaǵan. Sol sebepti kriminalist joǵalǵan balalardy izdeý kezinde mundai aýyr nusqany da nazardan tys qaldyrmaý qajet ekenin aitady.
Qazirgi ýaqytta Qyzyl qalasynda izdeý jumystary toqtaǵan joq. Qutqarýshylar, politsiia qyzmetkerleri, eriktiler jáne jergilikti turǵyndar ózen jaǵalaýyn, eldi meken mańyn jáne kúdik týdyrǵan aýmaqtardy qarap jatyr. Tergeý organdary ázirge naqty qorytyndy shyǵarǵan joq. Resmi derek boiynsha, qyzdardyń naqty qaida ekeni áli belgisiz.
