Тува Республикасының Қызыл қаласында жоғалып кеткен екі 12 жастағы қызды іздеу жұмыстары жетінші тәулікке жалғасып жатыр. Амина мен Айлана 1 шілде күні кешкі уақытта серуендеуге шығып, сол күйі үйіне оралмаған. Қазір бұл оқиғаға қатысты бірнеше нұсқа қарастырылып жатыр. Соның ішінде қыздардың суға батып кетуі де, олардың қылмыстық әрекеттің құрбаны болуы да жоққа шығарылмайды, деп хабарлайды dalanews.kz.
Aif.ru басылымына сұхбат берген криминалист Михаил Игнатов тергеу барысында анықталған кейбір деректер істің криминалдық сипаты болуы мүмкін екенін айтты. Оның сөзінше, жоғалған қыздардың телефондары мен аяқ киімдерінің табылу жағдайы күдік тудырады.
Белгілі болғандай, жедел-іздестіру шаралары кезінде бейнебақылау камераларының жазбалары тексерілген. Кадрларда екі қыздың Енисей өзені бойындағы бөгет жаққа қарай кетіп бара жатқаны көрінеді. Кейін өзен жағасынан олардың ұялы телефондары табылған. Құқық қорғау органдарының мәліметінше, телефондар ұқыпты түрде жиналып, өшірілген күйде жатқан. Бір қызығы, құрылғылардың қуаты әлі таусылмаған болған.
Кейінірек өзеннен қыздардың аяқ киімдері де табылды. Алдымен бір қыздың сандалы телефондар табылған жерден шамамен 400 метр қашықтықтан шыққан. Одан соң екінші қыздың аяқ киімі Енисей ағысы бойымен 22 шақырым төмен жерден табылған. Бұл заттарды жоғалған балалардың туыстары таныған.
Осы деректерден кейін Ресей Тергеу комитеті Қылмыстық кодекстің 105-бабы 2-бөлігі бойынша қылмыстық іс қозғады. Негізгі нұсқалардың бірі – қыздардың суға кетуі. Алайда туыстары балалардың ұрлануы мүмкін екенін айтып отыр.
Бұл нұсқаны жергілікті тұрғындар арасында тараған тағы бір жағдай күшейте түскен. Жергілікті көріпкел қыздар белгілі бір үйде ұсталуы мүмкін екенін айтқан. Осыдан кейін ашуға булыққан тұрғындар сол үйге басып кірмек болған. Оқиға орнына жеткен құқық қорғау қызметкерлері ғимаратты тексергенімен, жоғалған қыздардың ізі табылмаған.
Криминалист Михаил Игнатовтың айтуынша, телефондардың өшірілген күйде ұқыпты жатуы және аяқ киімдердің әр жерден табылуы қарапайым оқиғаға ұқсамайды.
«Өшірілген телефондар мен табылған аяқ киімдер бұл істе қылмыстық із болуы мүмкін екенін көрсетеді. Айналаны мұқият тексеру керек: олар қайда баруы мүмкін, оларды қай жаққа алып кетуі ықтимал? Егер бұл шынымен қылмыстық нұсқа болса, онда мұның артында қыздарды ұрлап, бір жерде ұстап отырған адам болуы мүмкін. Скопинск маньягы оқиғасындағыдай жағдай болуы да ғажап емес», – деді сарапшы.
Сарапшы атап өткен Скопинск маньягы – Виктор Мохов 2000 жылы екі кәмелетке толмаған қызды ұрлап, оларды жертөледе бірнеше жыл бойы қамауда ұстаған. Сол себепті криминалист жоғалған балаларды іздеу кезінде мұндай ауыр нұсқаны да назардан тыс қалдырмау қажет екенін айтады.
Қазіргі уақытта Қызыл қаласында іздеу жұмыстары тоқтаған жоқ. Құтқарушылар, полиция қызметкерлері, еріктілер және жергілікті тұрғындар өзен жағалауын, елді мекен маңын және күдік тудырған аумақтарды қарап жатыр. Тергеу органдары әзірге нақты қорытынды шығарған жоқ. Ресми дерек бойынша, қыздардың нақты қайда екені әлі белгісіз.
