Kólik mınıstri Marat Qarabaev osy jyly 12 myń shaqyrym jol jóndeýden ótetinin málimdedi, dep habarlaıdy Dalanews.kz.

Mınıstr elimizdegi avtojoldardyń jaı-kúıine toqtala otyryp, bıyl jol jóndeý jumystarynda rekordtyq kórsetkish ornatylatynyn basa aıtty.

"Osy jyly jol jóndeý jáne qurylys jumystary 12 myń shaqyrymdy qamtıdy. Bul – buryn sońdy bolmaǵan rekordtyq kórsetkish. Bul rette, jóndeletin joldardyń 8 myń shaqyrymy – respýblıkalyq, 4 myń shaqyrymy jergilikti jelige tıesili. Jyldyń sońyna deıin 7 myń shaqyrymda qurylys jáne jóndeý jumystary aıaqtalady", - dedi Qarabaev.

Qarabaevtyń sózinshe, respýblıkalyq joldardy kútip ustaýǵa ǵana jyl saıyn 80 mlrd teńge qajet. Jalpy Qazaqstandaǵy avtojol uzyndyǵy 95 myń shaqyrymdy quraıdy. Onyń 25 myń shaqyrymy respýblıkalyq, al qalǵan 70 myń shaqyrymy jergilikti joldarǵa jatady.

"Respýblıkalyq mańyzy bar 25 myń shaqyrym joldardy kútip ustaýǵa 80 mlrd teńge qajet. Sondyqtan, búdjetke artyq salmaq túsirmeý úshin aqyly joldardy engizý jumystary jalǵasady. Búgingi tańda aqyly joldardyń jalpy uzyndyǵy — 3 myń 200 shaqyrym. Ótken jyldyń qorytyndysy boıynsha bul joldardan 30 mlrd teńge jınaldy", — dedi ol.

Mınıstr atalǵan qarajat joldy kútip ustaýǵa, aǵymdaǵy jóndeýge jáne tehnıka satyp alýǵa jumsalǵanyn atap ótti.

"Rekonstrýksıadan ótken joldardy normatıvtik deńgeıde kútip ustaý úshin bıyl jalpy uzyndyǵy 2 myń shaqyrymnan asatyn 11 ýchaskege kezeń-kezeńimen aqy alýdy engizý josparlanyp otyr", — dedi Marat Qarabaev.