كولىك ءمينيسترى مارات قارابايەۆ وسى جىلى 12 مىڭ شاقىرىم جول جوندەۋدەن وتەتىنىن مالىمدەدى، دەپ حابارلايدى Dalanews.kz.

مينيستر ەلىمىزدەگى اۆتوجولداردىڭ جاي-كۇيىنە توقتالا وتىرىپ، بيىل جول جوندەۋ جۇمىستارىندا رەكوردتىق كورسەتكىش ورناتىلاتىنىن باسا ايتتى.

"وسى جىلى جول جوندەۋ جانە قۇرىلىس جۇمىستارى 12 مىڭ شاقىرىمدى قامتيدى. بۇل – بۇرىن سوڭدى بولماعان رەكوردتىق كورسەتكىش. بۇل رەتتە، جوندەلەتىن جولداردىڭ 8 مىڭ شاقىرىمى – رەسپۋبليكالىق، 4 مىڭ شاقىرىمى جەرگىلىكتى جەلىگە تيەسىلى. جىلدىڭ سوڭىنا دەيىن 7 مىڭ شاقىرىمدا قۇرىلىس جانە جوندەۋ جۇمىستارى اياقتالادى"، - دەدى قارابايەۆ.

قارابايەۆتىڭ سوزىنشە، رەسپۋبليكالىق جولداردى كۇتىپ ۇستاۋعا عانا جىل سايىن 80 ملرد تەڭگە قاجەت. جالپى قازاقستانداعى اۆتوجول ۇزىندىعى 95 مىڭ شاقىرىمدى قۇرايدى. ونىڭ 25 مىڭ شاقىرىمى رەسپۋبليكالىق، ال قالعان 70 مىڭ شاقىرىمى جەرگىلىكتى جولدارعا جاتادى.

"رەسپۋبليكالىق ماڭىزى بار 25 مىڭ شاقىرىم جولداردى كۇتىپ ۇستاۋعا 80 ملرد تەڭگە قاجەت. سوندىقتان، بيۋدجەتكە ارتىق سالماق تۇسىرمەۋ ءۇشىن اقىلى جولداردى ەنگىزۋ جۇمىستارى جالعاسادى. بۇگىنگى تاڭدا اقىلى جولداردىڭ جالپى ۇزىندىعى — 3 مىڭ 200 شاقىرىم. وتكەن جىلدىڭ قورىتىندىسى بويىنشا بۇل جولداردان 30 ملرد تەڭگە جينالدى"، — دەدى ول.

مينيستر اتالعان قاراجات جولدى كۇتىپ ۇستاۋعا، اعىمداعى جوندەۋگە جانە تەحنيكا ساتىپ الۋعا جۇمسالعانىن اتاپ ءوتتى.

"رەكونسترۋكسيادان وتكەن جولداردى نورماتيۆتىك دەڭگەيدە كۇتىپ ۇستاۋ ءۇشىن بيىل جالپى ۇزىندىعى 2 مىڭ شاقىرىمنان اساتىن 11 ۋچاسكەگە كەزەڭ-كەزەڭىمەن اقى الۋدى ەنگىزۋ جوسپارلانىپ وتىر"، — دەدى مارات قارابايەۆ.