Qazaq ulttyq qyzdar pedagogikalyq ýniversitetinde «Quryltai – memlekettik institýt tuǵyry» atty konferentsiia ótti. Ǵylymi is-shara ýniversitette bastaý alǵan «Mektep – ýniversitet – naryq: bilim berýdiń jańa arhitektýrasy» pedagogikalyq ideialar festivali aiasynda uiymdastyryldy, dep habarlaidy dalanews.kz.
Konferentsiia barysynda «Quryltai fenomeni» atty jańa kitaptyń tusaýkeseri ótti. Zertteý jumysynyń bastamashysy ári kitap avtory – memleket jáne qoǵam qairatkeri, Qazaq ulttyq qyzdar pedagogikalyq ýniversiteti Direktorlar keńesiniń tóraǵasy, ekonomika ǵylymdarynyń doktory Omarhan Nurtaiuly Óksikbaev. Avtor shyǵystanýshy, túrkolog-lingvist ǵalym Záripbai Jumanuly Orazbaimen birlesip, ortaǵasyrlyq derekterdi júielegen. Sondai-aq eńbekte adamzat tarihyndaǵy alǵashqy quryltai dástúrlerinen bastap qazirgi Qazaqstandaǵy saiasi jańǵyrý úderisine deiingi tarihi sabaqtastyq ǵylymi turǵyda taldanǵan.
Omarhan Nurtaiuly búgingi tańda Memleket basshysy Qasym-Jomart Toqaev júrgizip otyrǵan saiasi reformalar aiasynda ulttyq memlekettilik dástúrin jańasha paiymdaý máselesi airyqsha mańyzǵa ie ekenin aitty.
– Kitapta Prezident bastamasymen qaita jandanǵan Quryltai fenomeni tarihi ári ǵylymi negizde saralandy. «Quryltai» uǵymynyń etimologiialyq jáne mazmundyq mánin tereń ashyp kórsetý, sondai-aq onyń Uly Daladaǵy memlekettik basqarý dástúrimen tarihi sabaqtastyǵyn ǵylymi turǵydan zerdeleý – ulttyq tarihi sanany nyǵaitýǵa baǵyttalǵan mańyzdy qadamdardyń biri, – dedi Omarhan Nurtaiuly.
Atalǵan eńbektiń ereksheligi – kitap mazmuny qazaq tiline alǵash ret aýdarylǵan onǵa jýyq ortaǵasyrlyq qoljazba negizinde daiyndalǵan.
Shyǵystanýshy ǵalym Záripbai Jumanuly kitap mazmunyna toqtalyp, «Jinaqtalǵan tyń derekter men ǵylymi zertteýler nátijesinde jaryq kórgen eńbek ulttyq memlekettilik tarihyn tereń paiymdaýǵa, tarihi jadymyzdy jańǵyrtýǵa jáne ulttyq sanany nyǵaitýǵa qyzmet etedi, – dedi.
Ýniversitet rektory Beibitkúl Sársemhanqyzy óz sózinde: «Quryltai fenomeni» kitaby – Uly Dala órkenietindegi Quryltai institýtyn jan-jaqty zerdeleýge arnalǵan mazmundy ǵylymi eńbek. Memleketimizdiń qalyptasý tarihyn jańa kózqaraspen saralaý ulttyq jadymyzdy jańǵyrtyp qana qoimai, jas urpaqtyń boiyndaǵy otansúigishtik pen patriottyq sezimdi nyǵaitýǵa yqpal etedi, – dep kitap avtorlarynyń ǵylymi izdenisterin erekshe atap ótti.
Ýniversitettiń Áleýmettik-gýmanitarlyq ǵylymdar jáne óner institýtynyń «Uly Dala tarihy» ǵylymi-zertteý ortalyǵy uiymdastyrǵan bul sharaǵa belgili memleket jáne qoǵam qairatkerleri, bilikti ǵalymdar, ziialy qaýym ókilderi men professor-oqytýshylar qatysty.
Jiynǵa Ulttyq jaratylystaný ǵylymdary akademiiasynyń akademigi Uzaqov Iasin Málikuly, qoǵam qairatkeri, etnomádeni birlestikterdiń belsendi ókili, filologiia ǵylymdarynyń doktory, professor Asyly Osman, memleket jáne qoǵam qairatkeri, bilikti pedagog Orazkúl Asanǵazyqyzy arnaiy kelip,óz oilarymen bólisti.
Konferentsiia barysynda ǵalymdar quryltai uǵymyna qatysty ózara pikir almasyp, ýniversitettiń professor-oqytýshylar quramymen tájiribe bólisti.
