AQSh prezidenti Donald Tramp Iran jaqyn arada Ormýz buǵazyn ashýy tiis ekenin, keri jaǵdaida amerikalyq áskeriler elge «óte kúshti soqqy» jasaitynyn málimdedi, dep habarlaidy dalanews.kz.
«Buǵaz óte jaqyn arada ashylady. Áitpese olar óte aýyr soqqyǵa ushyraidy, sodan keiin buǵaz báribir ashylady», – dedi Tramp Fox News telearnasyna bergen suhbatynda.
Onyń málimdemesi AQSh pen Iran arasyndaǵy shielenis aiasynda aityldy. Tramptyń sózinshe, Ormýz buǵazynyń ashylýy óńirdegi jaǵdaidy turaqtandyrý úshin mańyzdy sharttardyń biri bolyp otyr.
Axios basylymynyń málimetinshe, Iran men Oman Ormýz buǵazyn paidalaný tártibi jónindegi ýaqytsha kelisim týraly 5 tamyz, sársenbi kúni jariialaýy múmkin. AQSh-tyń resmi ókili men óńirlik derekkózdiń málimetinshe, Iran biligi seisenbi kúni kelisimdi maquldaý rásimin aiaqtaǵan.
Derekkózderdiń aitýynsha, talqylanyp jatqan qujat Ormýz buǵazy boiynsha Iran men Oman arasynda 60 kúnge eseptelgen ýaqytsha kelisimdi kózdeidi. Qajet bolǵan jaǵdaida onyń merzimin uzartý múmkindigi qarastyrylǵan. Kelisim jobasyna sáikes, Ormýz buǵazy men Parsy shyǵanaǵyna kiretin barlyq kemeler Irannyń aýmaqtyq sýlary arqyly ótetin soltústik baǵytpen qozǵalady. Al buǵaz arqyly Arab teńizine shyǵatyn kemeler Iranmen úilestirile otyryp, Oman sýlary arqyly ótetin ońtústik baǵytty paidalanady.
Sondai-aq alǵashqy 60 kún ishinde kemelerden eshqandai alym alynbaidy. Osy kezeńde taraptar buǵazdyń ortalyq bóligindegi minalardy tazartý jumystaryn júrgizip, ony 30 kún ishinde aiaqtaýdy josparlap otyr.
