OrdaMed kompaniiasy meditsinalyq jabdyqtardy qoldan jasaýmen ainalyspaǵanyn jáne Qazaqstan klinikalaryna naqty óndirilgen ári tirkeýden ótken tehnikany jetkizgenin málimdedi. Atalǵan qurylǵylar búginde patsientterdi emdeý barysynda naqty paidalanylyp otyr, dep habarlaidy Dalanews.kz Nege.kz saityna silteme jasap.
OrdaMed kompaniiasynyń negizin qalaýshy ári basshysy Erkin Dlimbetov birqatar buqaralyq aqparat quraldarynda meditsinalyq jabdyqty falsifikatsiialaý jóninde taraǵan aqparatqa áleýmettik jelilerde túsinikteme berdi. Onyń aitýynsha, kompaniia jalǵan nemese is júzinde joq ónimdi jetkizbegen ári «aýa» úshin tólem almaǵan.
Ol barlyq jabdyqtyń naqty jetkizilip, paidalanýǵa berilgenin jáne uzaq ýaqyt boiy elimizdegi memlekettik jáne jekemenshik meditsinalyq mekemelerde qoldanylyp kele jatqanyn atap ótti. Erkin Dlimbetovtiń sózinshe, jabdyqtyń bar ekeni men jumys istep turǵany respýblika boiynsha meditsina qyzmetkerleri men klinikalar tarapynan rastalyp otyr.
OrdaMed ókilderi bul jerde ónimdi qoldan jasaý emes, ótken jyldardaǵy óndiristik jáne uiymdastyrýshylyq rásimderge qatysty quqyqtyq túsindirý máselesi sóz bolyp otyrǵanyn aitady. Atap aitqanda, áńgime lokalizatsiia talaptary men qujattardy rásimdeý tártibine bailanysty. Kompaniia sot sheshimi shyqpai turyp «falsifikatsiia» terminin qoldaný durys emes dep sanaidy, óitkeni bul tek bizneske ǵana emes, atalǵan jabdyq paidalanylatyn meditsinalyq uiymdardyń bedeline de nuqsan keltiredi.
Kompaniia basshysy OrdaMed tergeý organdarymen tolyq yntymaqtastyq ornatyp otyrǵanyn, barlyq tekserýge ashyq ekenin jáne istiń mán-jaiy obektivti ári ádil qaralýyna múddeli ekenin jetkizdi. Qazirgi ýaqytta kompaniia jumysy qalypty rejimde jalǵasyp jatyr, dárigerler, patsientter, seriktester men memleket aldyndaǵy barlyq mindettemeler oryndalýda.
Eske salaiyq,UQK OrdaMed basshylaryn ustaǵan bolatyn.
