Túrkistan oblysy Ordabasy aýdanynda ótken jyly eki páterli kommýnaldyq 14 turǵyn úi paidalanýǵa tapsyrylǵan. Al aldaǵy eki jylda «Nurly jer» baǵdarlamasymen 480 páterdi el igiligine berý kózdelýde.
Sondai-aq, aǵymdaǵy jyly 720 oryndyq 5 jekemenshik balabaqsha ashyp, balalardy mektepke deiingi oqytý men tárbieleýdiń qamtylýyn 87,5 paiyzǵa jetkizý josparlanyp otyr. Bul týraly Ordabasy aýdany ákiminiń orynbasary Ǵalymjan Úsenbaev málim etti.
Onyń aitýynsha Ordabasy aýdanynda «Indýstriialyq-innovatsiialyq damý» memlekettik baǵdarlamasy aiasynda 2010-2015 jyldar aralyǵynda 11 joba iske qosylyp, 1027 azamat jumyspen qamtylǵan.
«Indýstriialandyrý kartasy aiasynda ótken jyly «Bórte milka» JShS-niń sút óńdeý zaýyty jumysyn bastady. Jalpy quny 4,4 mlrd. teńgeni quraityn óndiris orny 70-ke jýyq adamǵa jumys taýyp berip otyr. 2017 jyly óńdeý ónerkásibi salasynda 14 mlrd. 835 mln. teńgeniń ónimi óndirilse, aǵymdaǵy jyly kórsetkishti 18 mlrd. 128 mln. teńgege jetkizý kózdelýde», - dedi Ǵalymjan Úsenbaev.
Aita keterligi, indýstriialdy-innovatsiialyq damý memlekettik baǵdarlamasy boiynsha aýdanda 2018 jyly jalpy quny 3 mlrd. 741 mln. teńgeni quraityn 4 investitsiialyq jobany iske asyrý josparlanýda. Atalǵan jobalar iske qosylǵanda 200-den asa adam jumyspen qamtylady.
Sonymen qatar, biyl aýdandaǵy aýylsharýashylyǵy ónim kólemin 39 mlrd. teńgege ulǵaitý josparlanyp otyr. Sondai-aq, ótken jyly aýdanda 2 modýldi sút qabyldaý beketi ashylǵan.
Aýdan basshysy orynbasarynyń málimdeýinshe, óńirde infraqurylym salasy da óz sheshimin taýyp keledi.
«Qazirgi tańda aýdan kólemindegi 57 eldi mekenniń 40-y aýyz sýmen 24 saǵat boiy qamtylyp, kórsetkish 90,7 paiyzyn qurady. Ózge 17 eldi meken turǵyndary qudyq sýyn paidalanady, ol jalpy halyqtyń 9,3 paiyzy. Halyqty kógildir otynmen qamtý boiynsha 2022 jyly aýdan halqynyń 100 paiyzy tolyǵymen tabiǵi gazben qamtylady dep josparlanýda», - dedi Ǵalymjan Úsenbaev.
Ordabasy aýdanynda «Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan baǵdarlamasy» boiynsha 4002 qatysýshy azamatqa áleýmettik qoldaý kórsetilip, jospar 142,1 paiyzǵa oryndalǵan.
