Oral qalasyndaǵy kópsalaly balalar aýrýhanasynda pasıentterge kógergen nan taratylǵany jóninde shaǵym jarıalandy, dep habarlaıdy Dalanews.kz.

Pasıenttiń aıtýynsha, aýrýhanada berilgen nan birneshe kún qatarynan kógergen bolyp shyqqan.

«Berilgen tilimderdiń bárin qarap shyqtym – bárinde kógergen iz bar. Ózim júkti bolǵandyqtan, endi balam úshin alańdap otyrmyn. Mundaı nandy úshinshi kún qatarynan ákelip jatyr. Shaǵym aıtsaq, “bizge qalaı jetkizse, solaı beremiz” dep jaýap beredi. Búgin de dál sondaı nan ákeldi. Ónimniń buzylǵanyn bile tura, báribir balalarǵa berip otyr. Bul qalaı bolǵany?» – deıdi basylymǵa júgingen áıel.

Portal málimetinshe, áıel pýlmonologıa bóliminde balasymen birge em qabyldap jatyr. Onyń sózinshe, kógerý belgileri bar nan pasıentterge úshinshi kún qatarynan taratylǵan. Ónimdi tutynǵannan keıin onyń ishi ótip, densaýlyǵy nasharlaǵanyn aıtady.

Batys Qazaqstan oblystyq densaýlyq saqtaý basqarmasy jaǵdaıǵa qatysty keıinirek túsinikteme berýge ýáde etken.