Oral qalasynda ótken jyly kópqabatty úidiń aýlasynda tiridei órtenip ketken 8 jastaǵy Artemniń ólimine qatysty qylmystyq is toqtatyldy. Bul týraly marqum balanyń anasy Mýhabbat Pardaeva málimdedi, dep habarlaidy dalanews.kz "Moi gorod" portalyna silteme jasap.
Qaiǵyly oqiǵa 2025 jylǵy 10 tamyzda Qonaev kóshesindegi kópqabatty úidiń aýlasynda bolǵan. Jazǵy demalysqa ájesiniń úiine kelgen Artem sol kúni dostarymen oinaýǵa shyǵyp, arada birneshe saǵat ótken soń denesiniń basym bóligi kúigen kúide úiine jetkizilgen. Anasynyń aitýynsha, balanyń denesiniń 96 paiyzy kúiip qalǵan. Ol esin joǵaltpaǵanymen, ózin kim órtegenin naqty aita almaǵan. Tek «meni óltirgisi keldi» degen sózdi qaitalai bergen.
Marqumnyń anasy tergeý jumystarynyń durys júrgizilmegenine shaǵymdandy. Onyń sózinshe, qylmystyq is 2026 jyldyń aqpan aiynda toqtatylǵan. Áiel dálelderdiń basym bóligin ózderi jinaǵanyn aitady. Atap aitqanda, mektep pen dúken kameralaryndaǵy jazbalardy politsiia emes, ózi izdep tapqan.
Sondai-aq podezdegi beinebaqylaý kamerasynyń jazbalary nebári jeti kún saqtalǵandyqtan, tergeýshiler ýaqyt ótkizip alyp, mańyzdy kadrlar joǵalyp ketken. Otbasyna tek úzindi beineler kórsetilgen.
«Is jai ǵana turyp qaldy. Eshkim naqty jumys istemedi. Politsiia bizdiń is boiynsha áreket etken joq», – deidi balanyń anasy.
Otbasynyń aitýynsha, oqiǵaǵa kámeletke tolmaǵandar qatysy bolýy múmkin. Alaida olar jaýapkershilikke tartylmaǵan.
Ádildikke qol jetkize almaǵan soń, balanyń ákesi videoúndeý jariialap, kinálilerdi tabýdy suraǵan. Biraq keiin ózderine qarsy politsiiaǵa aryzdar túsken. Otbasy advokat jaldap, ózderin qorǵaýǵa májbúr bolǵan.
Batys Qazaqstan oblystyq politsiia departamenti is boiynsha barlyq qajetti saraptamalar júrgizilgenin habarlady. Tergeý QR QPK-niń 35-baby 1-bóligi 2-tarmaǵyna sáikes, qylmystyq quqyq buzýshylyq quramy bolmaǵandyqtan toqtatylǵan.
