Oral qalasynda sý tasqynynan zardap shekken turǵyndardyń qonys toiy jalǵasýda. Keshe Derkól men Zashaǵan kentinde 183 úi paidalanýǵa berilse, búgin Juldyz shaǵyn aýdanynda 192 januiaǵa jańa baspananyń kilti tapsyryldy.
BQO boiynsha tasqynnan zardap shekkenderge 775 úi salynǵan edi. Qazirde turǵyndarǵa 685 úidiń kilti tabystaldy. Endi qalǵany Qaratóbe aýdany, Qorjyn aýylynda 3 qyrkúiek kúni tabystalady.
Osylaisha Batys Qazaqstan oblysynda tasqynnan zardap shekken turǵyndardy baspanamen qamtý máselesi tolyqtai sheshimin tabady.
Oraldaǵy Juldyz shaǵyn aýdanynyń turǵyndaryn qonys toimen Batys Qazaqstan oblysynyń ákimi Nariman Tóreǵaliev quttyqtady.
– Memleket basshysy Qasym-Jomart Kemelulynyń tapsyrmasyna sáikes, Úkimettiń qoldaýymen tasqynnan zardap shekken turǵyndarǵa zań aiasynda tiisti kómek kórsetildi. Biz kesheden beri Oral qalasynyń saiajailar alqabynda turyp, tasqynda jalǵyz baspanasynan aiyrylǵandarǵa jańa úilerdiń kiltterin tabys etip jatyrmyz. Qurylys jumystary tolyq aiaqtaldy. Úige qatysty injenerlik jelilerdi, gaz-sýyn tolyq tartyp berdik. Halyqqa qolaily bolý úshin asfalt salyp bereiin dep jatyrmyz. Sonymen qatar bul úilerge adamdar kóp qonystanǵandyqtan, balalar oinaityn oiyn alańyn da salyp beremiz, – dedi BQO ákimi Nariman Tóreǵaliev.
Oral turǵyny Qarlyǵa Jarmuhambetova sý tasqyny kezinde turyp jatqan jalǵyz baspanasynan airylǵan. Búgin jańa úiine kirip, qýanyshyn jasyra almady.
– Kórshilerimizben “Juldyz” shaǵyn aýdanyna keremet jańa úige qonystanyp jatyrmyz. Memleket basshysy Qasym-Jomart Toqaevqa, Úkimetke halyqqa jasaǵan qamqorlyǵy úshin alǵysymyz sheksiz. Bala-shaǵamyzben jańa, keń úige kirdik. Qýanyshymyzda shek joq, – dedi qala turǵyny Qarlyǵa Jarmuhambetova.
Osylaisha Oral qalasynda sý tasqynynan zardap shekken saiajai turǵyndary úshin salynǵan 375 úidiń qurylysy ýaqytynda bitti.
Budan bólek, saiajai turǵyndaryna Oral qalasynan 1416 páter satyp áperilgen.
