Oral qalasynyń №2 soty aýrýhanaǵa jetkizilgennen keiin kelesi kúni jansaqtaý bóliminde kóz jumǵan 58 jastaǵy er adamnyń isi boiynsha sheshim shyǵardy. Sot marqumnyń ulynyń talabyn ishinara qanaǵattandyryp, qalalyq aýrýhanany 4 million teńge kóleminde moraldyq ziiandy óteýge mindettedi. Bul týraly Qazaqstan Respýblikasy Joǵarǵy sotynyń baspasóz qyzmeti málimdedi, dep habarlaidy dalanews.kz.
Is materialdaryna sáikes, marqumnyń uly ákesiniń qaitys bolýyna dárigerlerdiń áreketi nemese áreketsizdigi sebep bolýy múmkin dep eseptep, aýrýhana men emdeýshi dárigerdi sotqa bergen. Alaida meditsinalyq mekeme talap-aryzben kelispegen.
Buǵan deiin marqumnyń týystary politsiiaǵa júgingenimen, qylmystyq quqyq buzýshylyq belgileri anyqtalmaǵandyqtan, sotqa deiingi tergeý toqtatylǵan. Keiin Meditsinalyq jáne farmatsevtikalyq baqylaý komitetiniń aýmaqtyq departamenti tekserý júrgizip, naýqasqa meditsinalyq kómek kórsetý kezinde zań talaptarynyń buzylǵanyn anyqtaǵan.
"Patsient birneshe ret meditsinalyq kómek surap júgingenimen, oǵan qajetti tekserýler júrgizilmegen. Dárigerler ony mas kúide boldy dep boljaǵanymen, bul boljamdy rastaityn alkogoldik saraptama jasalmaǵan", - dep málimdedi Joǵarǵy sot.
Tek naýqas Densaýlyq saqtaý basqarmasynyń call-ortalyǵyna shaǵymdanǵannan keiin ǵana aýrýhanaǵa jatqyzylyp, oǵan ishemiialyq insýlt diagnozy qoiylǵan. Alaida em bastalǵanyna qaramastan, er adam kelesi kúni jansaqtaý bóliminde qaitys bolǵan.
Sot meditsinalyq kómektiń der kezinde kórsetilmeýi naýqasty ómirin saqtap qalýdyń naqty múmkindiginen aiyrǵan degen qorytyndyǵa kelgen.
"Osy mán-jailardy eskere otyryp, sot talapkerdiń aryzyn ishinara qanaǵattandyryp, qalalyq aýrýhanadan 4 million teńge kóleminde moraldyq ziian ótemaqysyn óndirý týraly sheshim qabyldady", - dep habarlady Joǵarǵy sot.
