Oralda bostandyqta júrgen ondaǵan sottalǵan azamat koloniiaǵa qamaldy, dep habarlaidy Dalanews.kz Batys Qazaqstan oblysy prokýratýrasynyń baspasóz qyzmetine silteme jasap.
«Biyl Oral qalasy boiynsha buryn shartty jazaǵa jáne bostandyǵyn shekteýge sottalǵan 68 adam jazany óteý tártibin qasaqana buzǵany úshin naqty bas bostandyǵynan aiyrý jazasyna aýystyryldy», – delingen beisenbi kúngi habarlamada.
Qadaǵalaý organynyń málimetinshe, «Zań men Tártip» tujyrymdamasyn iske asyrý aiasynda Oral qalasy prokýratýrasynyń bastamasymen probatsiia qyzmetinde esepte turǵan tulǵalar arasynda quqyq buzýshylyqtardyń aldyn alý maqsatynda sottalǵandardyń qatysýymen ashyq sot otyrystaryn ótkizý tájiribesi jalǵasýda.
«Osyndai sot otyrystarynyń birinde jazany óteý tártibin júieli túrde buzǵan (tirkeýge kelmegen, túngi ýaqytta turǵylyqty jerinde birneshe ret bolmaǵan) jáne qylmystyq quqyqbuzýshylyq jasaǵan eseptegi tulǵaǵa qatysty probatsiia qyzmetiniń usynýy qaraldy. Qaraý nátijesinde sot jazany aýystyrý týraly sheshim qabyldap, sottalǵan adam naqty merzimin óteý úshin túzeý mekemesine jiberildi. Sýdia men prokýror qatysýshylarǵa jazany óteý tártibin saqtaý men úkimdi oryndaýdaǵy jeke jaýapkershiliktiń mańyzdylyǵyn eske saldy», – dep túsindirdi prokýratýra.
