26 naýryzda Oral qalasynda nóser jańbyr quiyp, qolaisyz aýa raiy saldarynan búkil qala shalshyq sýǵa tolyp, qalalyq ákimdiktiń ǵimaratyn sý basqan, dep habarlaidy Dalanews.kz.
Sinoptikterdiń boljamynsha, jaýyn-shashyn taǵy 2 kúnge sozylýy múmkin.
Kommýnaldyq qyzmetter kúsheitilgen rejimde jumys istei bastaǵanmen, bárine birdei úlgermei jatyr.
"Tabiǵi apattan qalalyq ákimdiktiń eń tómengi qabaty – jertólede ornalasqan jer qatynastary bólimi zardap shekken. Qazir mundaǵy sý sorylyp jatyr", - delingen habarlamada.
Sonymen qatar qala turǵyndary da kómekke júginip jatyr. Birneshe kún ishinde 249 mekenjaidan 600-ge jýyq shaqyrtý túsken. Olar aýlasyna jetken qyzyl sýdyń úige kirip ketýinen qorqyp otyr.
Osyǵan bailanysty ashyq NQA portalynda Oral qalasy ákiminiń qalada jergilikti aýqymdaǵy tabiǵi sipattaǵy tótenshe jaǵdai jariialaý jónindegi sheshiminiń jobasy jariialandy.
"Batys Qazaqstan oblysynyń Oral qalasynda jergilikti aýqymdaǵy tabiǵi sipattaǵy tótenshe jaǵdai jariialansyn. "Oral qalasynyń turǵyn úi-kommýnaldyq sharýashylyǵy, jolaýshy kóligi jáne avtomobil joldary bólimi" memlekettik mekemesiniń basshysy zardap shekken obektilerdi tekserý júrgizsin", – delingen sheshim jobasynda.
Sheshim alǵashqy resmi jariialanǵan kúnnen bastap qoldanysqa engizilýi tiis.
