Oqý-aǵartý ministri Ǵani Beisembaev Úkimette ótken brifingte daýly aqparatqa pikir bildirdi. Buǵan deiin "muǵalim" 14 jastaǵy oqýshy qyzdy zorlady degen kúdikke ilingeni aityldy, dep habarlaidy Dalanews.kz.
Ministrdiń aitýynsha, bul - óreskel, eshqashan jol berilmeitin jaǵdai.
"Biz shuǵyl áreket ettik. Bizde balalardyń quqyǵyn qorǵaýǵa, balalardyń qaýipsizdigine qatysty kez kelgen jaǵdaiǵa arnalǵan algoritm bar. Balalardyń quqyǵyn qorǵaý komiteti jumys isteidi. Dereý tiisti sharalar qabyldadyq. Bul Almaty emes, Almaty oblysynda bolǵan. Muǵalim delingen adam eshqashan mektepte jumys istemegen. Sondyqtan buǵan da nazar aýdarý kerek. Biraq bul jaýapkershilikti tómendetpeidi", - dedi Beisembaev.
Ministrdiń pikirinshe, bul jaǵdaiǵa tiisti quqyqtyq baǵa berilýi kerek, qazir tergeý júrip jatyr.
Aita keteiik, buǵan deiin áleýmettik jeli men BAQ-ta "14 jastaǵy qyzǵa tiisti degen kúdikpen dombyra úiirmesiniń muǵalimi qamaldy" degen aqparat tarady.
Oqiǵanyń bári Ótegen batyr aýylyndaǵy qonaqúide bolǵan.
Almaty oblysy Politsiia departamenti bul is boiynsha tergeý júrgizilip jatqanyn habarlady.
"Politsiia qyzmetkerleri kúdiktini anyqtap, ustap aýdandyq bólimshege jetkizdi. Qazir bolǵan oqiǵanyń barlyq mán-jáiyn jan-jaqty, tolyq ári obektivti anyqtaýǵa baǵyttalǵan tergeý amaldary júrgizilip jatyr", - dep jazylǵan habarlamada.
