Senat depýtattary prezıdentke bilim týraly zańdy joldady, oǵan sáıkes mektep oqýshylaryna sabaqta telefon paıdalanýǵa tyıym salynady, dep habarlaıdy Dalanews.kz.

Zańnyń negizgi mindetteri jetim balalarǵa tálimgerlik ınstıtýtyn engizý, balalardyń qaýipsizdigin qamtamasyz etý, bilim berý uıymdarynyń basqarý erkindigin keńeıtý bolyp sanalady.

Zańda orta bilim berý uıymdarynda smartfondardy paıdalaný erejelerin bekitý qarastyrylǵan. Buǵan deıin Májilis depýtaty Ashat Aımaǵambetov norma tek sabaq kezindegi shekteýlerge qatysty dep túsindirgen bolatyn. Bala uıaly telefonyn mektepke alyp bara alady jáne ony úzilis kezinde paıdalana alady.

Senat depýtattary «Qazaqstan Respýblıkasynyń keıbir zańnamalyq aktilerine bilim berý, tálimgerlik jáne balalardyń qaýipsizdigi máseleleri boıynsha ózgerister men tolyqtyrýlar engizý týraly» zańdy maquldap, memleket basshysyna qol qoıýǵa jiberdi.