Ońtústik Qazaqstan oblysy ákiminiń ókimimen Saıram aýdanynyń ákimi bolyp Baqtıar Saparáliuly Mamaev taǵaıyndaldy.
Jańa basshyny tanystyrý sátinde óńir basshysy laýazym ıesiniń jumysyna tabys tilep, Saıram aýdanyndaǵy halyqtyń áleýmettik-ekonomıkalyq ál-aýqatyn kóterýdegi basshylyqta Elbasy tapsyrmalaryn merzimdi ári nátıjeli oryndaýdy tapsyrdy. Sonymen birge, aýdannyń damýyna óz úlesin qosqan burynǵy ákim Samat Saparbaevqa alǵysyn bildirip, qyzmetine sáttilik tiledi.
«Saıram Shymkent qalasyna irgeles jatqan aýdan. Osy óńirdiń ekonomıkalyq ahýalyn jaqsartý úshin shaǵyn jáne orta kásipkerlikti damytýǵa erekshe mán berilýi kerek. Ol úshin ınvestorlar men jergilikti kásipkerlerge qoılaıly jaǵdaı jasaý óte mańyzdy. Budan bólek, aýdannyń sáýlettik ınfraqurylymdyq damýyna da jańa serpin qajet. Aýdandaǵy taǵy bir ózekti máselelerdi biri – jer telimderi. Munda jer telimderin zańsyz ıelenýshiler kóp. Bul máseleni elimizdiń zańyna sáıkes tolyqqandy sheshýdi tapsyramyn», - dedi Janseıit Qanseıituly. Baqtıar Saparáliuly Mamaev 1969 jyly 1 maýsymda týylǵan, bilimi joǵary, mamandyǵy boıynsha biliktiligi - eńbekke baýlý jáne jalpy tehnıkalyq pánderiniń muǵalimi, zańger, kólik bakalavry.
Eńbek jolyn 1993 jyly Ońtústik Qazaqstan oblysy Qazyǵurt aýdanynyń Qyzylqıa aýyldyq keńesiniń hatshysy bolyp bastaǵan.
1997-2012 jyldary aralyǵynda Qazyǵurt aýdany ákimi apparaty jalpy bóliminiń bas mamany, aýmaqty damytý jáne kadrlarmen jumys bóliminiń bas mamany, Qyzylqıa aýyly okrýginiń ákimi, «Qazyǵurtsý» mekemesiniń dırektory, Qazyǵurt aýdandyq «Taza sý» komýnaldyq memlekettik kásipornynyń dırektory, Qazyǵurt aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń bastyǵy qyzmetterin atqarǵan.
2012 jyldyń naýryz aıynan bastap Ońtústik Qazaqstan oblysy Qazyǵurt aýdany ákiminiń orynbasary laýazymyn atqaryp keldi.
