Ońtústik Qazaqstan oblysynda jarty jyl ishinde 75 myńǵa jýyq adam "Órleý" jobasy aiasynda memleket qoldaýyna ie bolyp, respýblikada kósh bastady. Endi 2018 jyldyń 1 qańtarynan bastap qazirgi usynylatyn úsh túrli áleýmettik tólemderdiń ornyna ataýly áleýmettik kómektiń jańa sipaty engiziletin bolady. Ol úshin halyqty «Órleý» jobasyna jappai jumyldyryp, jumyspen qamtýdy qolǵa alǵan jón. Búgin bul týraly Ońtústik Qazaqstan oblysyna jasaǵan sapary barysynda elimizdiń Eńbek jáne halyqty áleýmettik qorǵaý ministri Tamara Dúisenova málim etti.
Ministrlik qolǵa alǵan "Órleý" jobasynyń maqsaty - ómirinde qiyn jaǵdaiǵa tap bolǵan jáne belgili bir sebepterge bailanysty tyǵyryqtan shyǵa almai jatqan azamattarǵa kómek qolyn sozý. Tyń tásildi synaqtan ótkizý aiasynda 2015 jyly kedeilik sheginen asqanǵa deiin turaqty túrde memleket járdemin ielenýge múmkindik beretin «Órleý» jobasy dúniege kelgen bolatyn. Bul rette memleket tarapy jumyspen qamtý ortalyqtary arqyly jeke is ashýǵa, oqý men jumysqa ornalasýǵa qarailasady. Ońtústik Qazaqstan oblysynda jarty jyl ishinde 75 myńǵa jýyq adam "Órleý" jobasy aiasynda memleket qoldaýyna ie bolyp, respýblikada kósh bastady.
Biyl 1 shildedegi jaǵdai boiynsha, Ońtústik Qazaqstan oblysynda shartty aqshalai kómek 12813 otbasyndaǵy 74705 adamǵa taǵaiyndalp, jalpy somasy 3,6 mlrd teńgeni quraǵan. Eńbekke qabiletti 13846 adam jumyspen qamtýǵa járdemdesý sharalarymen qamtylyp, onyń ishinde 11528 adam nemese 89,7% turaqty jumysqa ornalasqan.
Ministr oblys ákimdiginde ótken qorytyndy jiyn barysynda halyqty jumyspen qamtý jáne áleýmettik kómek kórsetý maqsatynda aýdan ákimderiniń jáne ózge de jergilikti quzyrly mekemelerdiń ýaqytsha naýqandarǵa urynbai, jumysty uzaq merzimge jemis beretindei sapaly júrgizýiniń mańyzdylyǵyn atap ótip, jalpy oblysta tyndyrylǵan is-qimyldardy oń baǵalady.
«Ońtústik Qazaqstan oblysynda jumyssyz jáne ózin ónimsiz jumyspen qamtyǵan azamattardy jańa jumyspen qamtý baǵdarlamasyna belsendi tartý qajet. Az qamtylǵan otbasylardy kóptep «Órleý» jobasyna jumyldyra alsaq, kelesi jyldan ataýly áleýmettik kómektiń jańa sipatyn iske qosýǵa da daiyndyq deńgeii sonshalyq joǵary bolmaq», - dedi Tamara Dúisenova.
Aǵymdaǵy jyly az qamtamasyz etilgen azamattarǵa esh nársege kúsh salmai-aq, áleýmettik kómektiń eń tómengi mólsherin alý, ne bolmasa jobaǵa qatysyp, turaqty jumysqa ornalasý múmkindigi týyp otyr. Sonymen qatar, jeke isin (mal, qus jáne ósimdik sharýashylyǵymen shuǵyldaný) ashý úshin 3 aidyń shartty aqshalai kómektiń somasyn birden alý tańdaýy berilýde.
Ońtústik Qazaqstan oblysynda jeke qosalqy sharýashylyqty jáne kásipkerlik qyzmetti damytýǵa birjolǵy qarajat somasyn tóleý arqyly járdemdesý tiimdiligin baiqatyp úlgerdi. Búgingi tańda "Órleý" jobasyna qatysýshylardyń qatarynda 400 birjolǵy shartty aqshalai kómek alýshy jeke kásipker retinde salyq organdaryna tirkelip úlgergen. «Órleý» jobasyn júzege asyrý nátijesinde shartty aqshalai kómek alýshylardyń kirisi 3,2 esege ósip, ortasha alǵanda adam basyna aiyna 18,1 myń teńge mejeledi.
Óńir basshysy ministrlik tarapynan qolǵa alynyp otyrǵan baǵdarlamalardyń mańyzdylyǵyna toqtaldy.
«Bul kúnderi ministrlik delegatsiiasy úlken jumys kólemin atqardy. Tamara Qasymqyzymen kelisemin, azamattardy tirkeý, derekterdi jandandyrý is-áreketterin jyldyń sońǵy kúnine deiin sozýdyń qajeti joq. Jaýapty memlekettik organdar barlyq azamattardy qamti alǵany jón», - dep túidi óz kezeginde oblys ákimi Janseiit Túimebaev.
Jalpy, Ońtústik Qazaqstanda Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan baǵdarlamasy sheńberinde 2017 jyly 64314 adamdy qamtý josparlanyp, jalpy 11,4 mlrd teńge bólindi. 2017 jyldyń 1 tamyzyna 49,6 myń adam qamtylyp, jyldyq jospardyń 77% oryndalǵan.
Budan bólek, jyl saiyn áleýmettik qoldaý sharalary aiasynda 7,8 myń zeinetker men múgedekke ardagerler úiinde ońaltý jáne saýyqtyrý kómegi jasalǵan. Onyń ústine jyl aiaǵyna deiin múmkindigi shekteýli 67 myńǵa jýyq adam áleýmettik ońaltý qyzmetterimen jáne tehnikalyq kómekshi quraldarmen qamtamasyz etiletini josparlanyp otyr.
