وڭتۇستىك قازاقستان وبلىسىندا جارتى جىل ىشىندە 75 مىڭعا جۋىق ادام "ورلەۋ" جوباسى اياسىندا مەملەكەت قولداۋىنا يە بولىپ، رەسپۋبليكادا كوش باستادى.  ەندى 2018 جىلدىڭ 1 قاڭتارىنان باستاپ قازىرگى ۇسىنىلاتىن ءۇش ءتۇرلى الەۋمەتتىك تولەمدەردىڭ ورنىنا اتاۋلى الەۋمەتتىك كومەكتىڭ جاڭا سيپاتى ەنگىزىلەتىن بولادى. ول ءۇشىن حالىقتى «ورلەۋ» جوباسىنا جاپپاي جۇمىلدىرىپ، جۇمىسپەن قامتۋدى قولعا العان ءجون. بۇگىن بۇل تۋرالى وڭتۇستىك قازاقستان وبلىسىنا جاساعان ساپارى بارىسىندا ەلىمىزدىڭ ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءمالىم ەتتى.

مينيسترلىك قولعا العان "ورلەۋ" جوباسىنىڭ ماقساتى -  ومىرىندە قيىن جاعدايعا تاپ بولعان جانە بەلگىلى ءبىر سەبەپتەرگە بايلانىستى تىعىرىقتان شىعا الماي جاتقان ازاماتتارعا كومەك قولىن سوزۋ. تىڭ ءتاسىلدى سىناقتان وتكىزۋ اياسىندا 2015 جىلى كەدەيلىك شەگىنەن اسقانعا دەيىن تۇراقتى تۇردە مەملەكەت جاردەمىن يەلەنۋگە مۇمكىندىك بەرەتىن «ورلەۋ» جوباسى دۇنيەگە كەلگەن بولاتىن. بۇل رەتتە مەملەكەت تاراپى جۇمىسپەن قامتۋ ورتالىقتارى ارقىلى جەكە ءىس اشۋعا، وقۋ مەن جۇمىسقا ورنالاسۋعا قارايلاسادى. وڭتۇستىك قازاقستان وبلىسىندا جارتى جىل ىشىندە 75 مىڭعا جۋىق ادام "ورلەۋ" جوباسى اياسىندا مەملەكەت قولداۋىنا يە بولىپ، رەسپۋبليكادا كوش باستادى.

بيىل 1 شىلدەدەگى جاعداي بويىنشا، وڭتۇستىك قازاقستان وبلىسىندا شارتتى اقشالاي كومەك 12813 وتباسىنداعى 74705 ادامعا تاعايىندالپ، جالپى سوماسى 3،6 ملرد تەڭگەنى قۇراعان. ەڭبەككە قابىلەتتى 13846 ادام جۇمىسپەن قامتۋعا جاردەمدەسۋ شارالارىمەن قامتىلىپ، ونىڭ ىشىندە 11528 ادام نەمەسە 89،7% تۇراقتى جۇمىسقا ورنالاسقان.

مينيستر وبلىس اكىمدىگىندە وتكەن قورىتىندى جيىن بارىسىندا حالىقتى جۇمىسپەن قامتۋ جانە الەۋمەتتىك كومەك كورسەتۋ ماقساتىندا اۋدان اكىمدەرىنىڭ جانە وزگە دە جەرگىلىكتى قۇزىرلى مەكەمەلەردىڭ ۋاقىتشا ناۋقاندارعا ۇرىنباي، جۇمىستى ۇزاق مەرزىمگە جەمىس بەرەتىندەي ساپالى جۇرگىزۋىنىڭ ماڭىزدىلىعىن اتاپ ءوتىپ، جالپى وبلىستا تىندىرىلعان ءىس-قيمىلداردى وڭ باعالادى.

 «وڭتۇستىك قازاقستان وبلىسىندا جۇمىسسىز جانە ءوزىن ءونىمسىز جۇمىسپەن قامتىعان ازاماتتاردى جاڭا جۇمىسپەن قامتۋ باعدارلاماسىنا بەلسەندى تارتۋ قاجەت. از قامتىلعان وتباسىلاردى كوپتەپ «ورلەۋ» جوباسىنا جۇمىلدىرا الساق، كەلەسى جىلدان اتاۋلى الەۋمەتتىك كومەكتىڭ جاڭا سيپاتىن ىسكە قوسۋعا دا دايىندىق دەڭگەيى سونشالىق جوعارى بولماق»، - دەدى تامارا دۇيسەنوۆا.

اعىمداعى جىلى از قامتاماسىز ەتىلگەن ازاماتتارعا ەش نارسەگە كۇش سالماي-اق، الەۋمەتتىك كومەكتىڭ ەڭ تومەنگى مولشەرىن الۋ، نە بولماسا جوباعا قاتىسىپ، تۇراقتى جۇمىسقا ورنالاسۋ مۇمكىندىگى تۋىپ وتىر.  سونىمەن قاتار، جەكە ءىسىن (مال، قۇس جانە وسىمدىك شارۋاشىلىعىمەن شۇعىلدانۋ) اشۋ ءۇشىن 3 ايدىڭ شارتتى اقشالاي كومەكتىڭ سوماسىن بىردەن الۋ تاڭداۋى بەرىلۋدە.   

وڭتۇستىك قازاقستان وبلىسىندا جەكە قوسالقى شارۋاشىلىقتى جانە كاسىپكەرلىك قىزمەتتى دامىتۋعا ءبىرجولعى قاراجات سوماسىن تولەۋ ارقىلى جاردەمدەسۋ تيىمدىلىگىن بايقاتىپ ۇلگەردى.  بۇگىنگى تاڭدا "ورلەۋ" جوباسىنا قاتىسۋشىلاردىڭ قاتارىندا 400 ءبىرجولعى شارتتى اقشالاي كومەك الۋشى جەكە كاسىپكەر رەتىندە سالىق ورگاندارىنا تىركەلىپ ۇلگەرگەن. «ورلەۋ» جوباسىن جۇزەگە اسىرۋ ناتيجەسىندە شارتتى اقشالاي كومەك الۋشىلاردىڭ كىرىسى 3،2 ەسەگە ءوسىپ، ورتاشا العاندا ادام باسىنا ايىنا 18،1 مىڭ تەڭگە مەجەلەدى.          

ءوڭىر باسشىسى مينيسترلىك تاراپىنان قولعا الىنىپ وتىرعان باعدارلامالاردىڭ ماڭىزدىلىعىنا توقتالدى.

«بۇل كۇندەرى مينيسترلىك دەلەگاسياسى ۇلكەن جۇمىس كولەمىن اتقاردى. تامارا قاسىمقىزىمەن كەلىسەمىن، ازاماتتاردى تىركەۋ، دەرەكتەردى جانداندىرۋ ىس-ارەكەتتەرىن جىلدىڭ سوڭعى كۇنىنە دەيىن سوزۋدىڭ قاجەتى جوق. جاۋاپتى مەملەكەتتىك ورگاندار بارلىق ازاماتتاردى قامتي العانى ءجون»، - دەپ ءتۇيدى ءوز كەزەگىندە وبلىس اكىمى جانسەيىت تۇيمەبايەۆ.

 جالپى، وڭتۇستىك قازاقستاندا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى شەڭبەرىندە 2017 جىلى 64314 ادامدى قامتۋ جوسپارلانىپ، جالپى 11،4 ملرد تەڭگە ءبولىندى. 2017 جىلدىڭ 1 تامىزىنا 49،6 مىڭ ادام قامتىلىپ، جىلدىق جوسپاردىڭ 77% ورىندالعان.

بۇدان بولەك، جىل سايىن الەۋمەتتىك قولداۋ شارالارى اياسىندا 7،8 مىڭ زەينەتكەر مەن مۇگەدەككە ارداگەرلەر ۇيىندە وڭالتۋ جانە ساۋىقتىرۋ كومەگى جاسالعان.  ونىڭ ۇستىنە جىل اياعىنا دەيىن مۇمكىندىگى شەكتەۋلى 67 مىڭعا جۋىق ادام الەۋمەتتىك وڭالتۋ قىزمەتتەرىمەن جانە تەحنيكالىق كومەكشى قۇرالدارمەن قامتاماسىز ەتىلەتىنى جوسپارلانىپ وتىر.