OQO-da omartashylar kooperativi qurylady
Qazyǵurt aýdanynyń tabiǵaty omartashylar úshin óte qolaily. Taýly óńirde búginde bal arasyn ustaityn jeke kásipkerlerdiń sany 20-ǵa jýyqtaidy. Olardyń arasynda Shymkent qalasy men Saryaǵash aýdanynan kelip, qolaily jer tańdap, bal óndirip otyrǵandar da az emes. Solardyń biri saryǵashtyq Sergei Marinkov 10 jyldan beri omartashylyqpen ainalysyp keledi. Ol búginde Qazyǵurt aýdany Sabyr Raqymov aýyl okýrigi mańyndaǵy jol boiynda bal arasyn ustap, tabiǵi taza ónim óndirip otyr. Oblys ákimi aýdandaǵy sapary barysynda Sergeidiń omartasyna arnaiy toqtap, jumysymen tanysty.
«Omartashy bolý – jaqsy kásip. Tabiǵattyń keremet jerinde bal arasyn ósirip, taza tabiǵi ónim alyp otyrǵan osyndai omartashylarǵa qoldaý bildirip, basyn qosyp, kooperativ qurý qajet. Sonda ǵana jumys júielenip, omartashylyq kásipti damytýǵa jol ashylady. Sondyqtan aldaǵy ýaqytta ońtústiktegi omartashylardyń basyn qosyp, aldaǵy josparlaryn talqylaityn bolamyz», - dedi Janseiit Qanseituly.
Sergei Marinkov oblys ákiminiń bul usynysyn qoldaitynyn jetkizip, bal óndirý isindegi jyldyq tabysynyń qupiiasymen bólisti.
«Omartashylyqpen inim, ákem úsheýmiz ainalysamyz. Saryaǵash aýdanynan arnaiy kelip, osynda ornalastyq. Búginde turaqty alymsaqtar úshin balymyzdyń bir kelisin 1500 teńgeden bosatyp jatyrmyz. Jalpy bir maýsymda 3,5 tonnadai bal óndiremiz», - deidi Sergei Marinkov.
Óńir basshysy aldaǵy ýaqytta qazyǵurttyq baldy brendke ainaldyrýdyń jolyn qarastyrý qajettigine toqtaldy. Óńirimizge keletin týristerge baldy qoljetimdi etý úshin oblys ortalyǵyndaǵy qonaq úilerge bal ónimderin pakettep usyný kózdelip otyr.
