Atap aıtqanda, baǵdarlama bastalǵan eki jyldyń birinshi jyly 324 páterli 9 qabatty turǵyn úı paıdalanýǵa berilip, 300-den astam otbasy qonys toıyn toılady. Sonymen birge, 2015 jyly atalǵan jumystardy iske asyryp, atqarýda 1200-ge jýyq adam jumyspen qamtyldy.
Ótken jyly «Nurly jol» aıasynda 10 bilim berý nysany halyq ıgiligine berildi. Máselen, byltyr 9 mektep (onyń 2-ýi apatty jaǵdaıda, 7-úsh aýysymdy) pen 1 balabaqshanyń (tapshylyq oryn) jańa qurylysy júrip, balalar 1 qyrkúıekten bastap jańa nysandarda bilim ala bastady. Sondaı-aq, turǵyn úılerdi ınjenerlik júıelermen qamtamasyz etý boıynsha Shymkent qalasy men Túlkibas aýdanyndaǵy 2 nysanǵa tıisti jumystar júrgizilip, merziminde tapsyryldy. Osylaısha, 2016 jyly atalǵan baǵdarlama aıasynda júrgizilgen qurylys nysandary arqyly 3655 adamǵa jumys oryndary ashyldy.
Al bıylǵy jospar boıynsha jyl sońyna deıin paıdalanýǵa berilýi tıis 19 bilim oshaǵynyń 3-ýi – Qazyǵurt aýdanynda 2 mektep, Saıram aýdanynda 1 mektep paıdalanýǵa berilse, qalǵan 16 bilim ordasy jańa jylǵa deıin jumysyn bastaıdy dep kútilýde. Atalǵan nysandar tolyq aıaqtalyp, halyq ıgiligine berilgende, Ońtústiktegi 12 myń oqýshy 8 apatty, 11 úsh aýysymdy mektepterdiń ornyna sýjańa bilim oshaqtarynda tálim alatyn bolady.
OQO ákiminiń baspasóz qyzmeti
