Ońtústiktiń jastary Astanada baýyrsaq taratty
Ońtústiktiń belsendi jáne talantty jastary Astanaǵy Ońtústik óńiriniń kúnderi aiasynda jergilikti jurtty erteńgi Qurban ait meiramymen quttyqtap, jergilikti halyq pen sheteldik qonaqtarǵa 5000 qaltasha iaǵni, 450 keli tətti toqash taratty.
Elbasynyń «Bolashaqqa baǵdar: rýhani jańǵyrý» baǵdarlamalyq maqalasyn nasihattaý maqsatynda uiymdasqan jastar Qurban aitpen quttyqtaý sherýin bas qaladaǵy «Han shatyr» oiyn-saýyq ortalyǵynan bastap, qoǵamdyq kólikterdi de aralady. Qurban aitpen quttyqtaýshylardyń baǵdarlamasynda, tipti, «EKSPO» qalashyǵynyń mańyndaǵy halaiyqqa da balǵyn baýyrsaqtan dám tatqyzý jospary bar.
Ulttyq óleńderdiń túr-túrin túrli aspaptarda quiqyljyta oryndap júrgen talantty jastar elordadaǵy negizgi – adam qarasy kóp jinalatyn jerlerde taratty. Sharapaty mol sharaǵa eriktiler men jas dombyrashylar jumyldyryldy. Ulttyq ándermen qatar, belgili sazger Sh.Qaldaiaqovtyń shyǵarmalarynan popýrri oryndap, shahar halqyn «Báiterek» alańynda ótetin «Astananyń juldyzdy túni» jastardyń dýmandy keshin tamashalaýǵa shaqyrdy.
«Astananyń juldyzdy túni» dýmandy keshinde Ońtústikten shyqqan Qazaqstannyń estrada juldyzdary – «Jigitter» kvarteti, Ǵazizhan Shekerbekov, elimizge tanymal barabanshy «Býrhan-stail», jas ánshiler «Boys band» triosy Astana aspanyn ánmen áýeleidi dep kútilýde. Sondai-aq, «GK» bi toby zamanaýi «breik» bilerin, «13-Legion» klýbynyń jastary kóshe sportynyń ónerlerin kórsetip, bas qala turǵyndary men qonaqtaryn tánti etpekshi. Kóńildi tapqyrlar klýbynyń talanttary da osynaý sharaǵa óz úlesin qosyp, kesh sońy jastardyń bi keshine ulasady.
OQO ákiminiń baspasóz qyzmet
