ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن ناسيحاتتاۋ ماقساتىندا ۇيىمداسقان جاستار قۇربان ايتپەن قۇتتىقتاۋ شەرۋىن باس قالاداعى «حان شاتىر» ويىن-ساۋىق ورتالىعىنان باستاپ، قوعامدىق كولىكتەردى دە ارالادى. قۇربان ايتپەن قۇتتىقتاۋشىلاردىڭ باعدارلاماسىندا، ءتىپتى، «ەكسپو» قالاشىعىنىڭ ماڭىنداعى حالايىققا دا بالعىن باۋىرساقتان ءدام تاتقىزۋ جوسپارى بار.
ۇلتتىق ولەڭدەردىڭ ءتۇر-تۇرىن ءتۇرلى اسپاپتاردا قۇيقىلجىتا ورىنداپ جۇرگەن تالانتتى جاستار ەلورداداعى نەگىزگى – ادام قاراسى كوپ جينالاتىن جەرلەردە تاراتتى. شاراپاتى مول شاراعا ەرىكتىلەر مەن جاس دومبىراشىلار جۇمىلدىرىلدى. ۇلتتىق اندەرمەن قاتار، بەلگىلى سازگەر ش.قالداياقوۆتىڭ شىعارمالارىنان پوپۋرري ورىنداپ، شاھار حالقىن «بايتەرەك» الاڭىندا وتەتىن «استانانىڭ جۇلدىزدى ءتۇنى» جاستاردىڭ دۋماندى كەشىن تاماشالاۋعا شاقىردى.
«استانانىڭ جۇلدىزدى ءتۇنى» دۋماندى كەشىندە وڭتۇستىكتەن شىققان قازاقستاننىڭ ەسترادا جۇلدىزدارى – «جىگىتتەر» كۆارتەتى، عازيزحان شەكەربەكوۆ، ەلىمىزگە تانىمال بارابانشى «بۋرحان-ستايل»، جاس انشىلەر «Boys band» تريوسى استانا اسپانىن انمەن اۋەلەيدى دەپ كۇتىلۋدە. سونداي-اق، «GK» بي توبى زاماناۋي «برەيك» بيلەرىن، «13-Legion» كلۋبىنىڭ جاستارى كوشە سپورتىنىڭ ونەرلەرىن كورسەتىپ، باس قالا تۇرعىندارى مەن قوناقتارىن ءتانتى ەتپەكشى. كوڭىلدى تاپقىرلار كلۋبىنىڭ تالانتتارى دا وسىناۋ شاراعا ءوز ۇلەسىن قوسىپ، كەش سوڭى جاستاردىڭ بي كەشىنە ۇلاسادى.
وقو اكىمىنىڭ باسپا ءسوز قىزمەت
