Oblys eldi mekenderin sapaly aýyz sýmen qamtamasyz etý maqsatynda «Óńirlerdi damytýdyń – 2020 jylǵa deıingi» baǵdarlamasyn aıasynda aýqymdy jumystar atqarylýda. Baǵdarlama boıynsha 2020 jylǵa deıin qala turǵyndarynyń 97 paıyzyn, aýyldyq eldimeken halqynyń 62 paıyzyn ortalyqtandyrylǵan aýyz sý qubyrymen qamtamasyz etý josparlanǵan. Osy baǵytta, 2011-2016 jyldary 73,9 mlrd.teńgege 268 nysannyń qurylysy júrgizilip, 178 eldi mekendegi 469 myń adam jańa ortalyqtandyrylǵan sý júıelerimen qamtylǵan.
– Halyqty aýyz sýmen qamtý boıynsha bizdiń oblystyń kórsetkishi respýblıkada qalalar boıynsha 92,9 paıyz, eldi mekender boıynsha 55,6 paıyzdy quraıdy. Ońtústik Qazaqstan oblysy respýblıka boıynsha qalalarda 9 orynǵa, aýyldyq eldi mekenderde 4 orynǵa ornalasyp, baǵdalamadaǵy 2020 jylǵa mejelengen kórsetkish merziminen buryn, artyǵymen oryndalyp otyr, – dedi basqarma basshysy Marǵulan Maraıym.
Al, bıylǵy jyly óńirde respýblıkalyq jáne oblystyq búdjet esebinen 4,7 mlrd. teńge kóleminde qarjy bólinip, 25 eldi mekende qurylys jumystary júrgizilýde. Sonyń ishinde 5 eldi meken halqy jańa aýyz sý qubyrlarymen qamtylsa, 3 eldi mekendegi tozyǵy jetken aýyz sý júıeleri jańartylatyn bolady. Qalǵan 17 eldi mekendegi qurylys jumystary 2018 jyly aıaqtalady dep kútilýde.
Atqarylǵan jumystarǵa qanyqqan óńir basshysy aýyz sýmen qamtý maqsatyndaǵy jumystardy júıelep, bólingen qarjylardyń maqsatty jumsalýyna mán berýdi tapsyrdy.
– Bizdiń maqsatymyz - halyqty taza aýyz sýmen qamtamasyz etý. Respýblıka boıynsha eldi mekenderdi aýyz sýmen qamtýda 4-shi orynda turmyz dep toqmeıilsýge bolmaıdy. Oblys kóleminde aýyz sýmen qamtylýy jaǵynan eń tómengi kórsetkish Arys qalasy men Saryaǵash, Shardara aýdandarynda oryn alyp otyr. Osy olqylyqtardyń ornyn toltyrý qajet. Aýyz sýmen qamtý maqsatyndaǵy jumystardy tıisti sala basshylaryna júıeleýdi tapsyramyn, – dedi J. Túımebaev.
Jıynda sondaı-aq tótenshe jaǵdaılar jónindegi departamentiniń basshysy N. Derbisovtiń baıandamasy tyńdaldy. Osy rette sý tasqynyna qarsy qorǵanys dambalary men sý qoımalarynyń qurylysyna qatysty birqatar eskerpeler berildi. Sondaı-aq oblys aýmaǵyndaǵy respýblıkalyq, oblystyq jáne aýdan ishilik mańyzy bar avtomobıl joldarynda 2017-2018 jylǵy qys mezgilinde kólik qatynasynyń úzilmeýin qamtamasyz etý máseleleri talqylandy.
Selektorlyq otyrysta «Densaýlyq» memlekettik baǵdarlamasynyń oryndalýy men oblystaǵy aýyl sharýashylyǵy maqsatyndaǵy jerlerdiń topyraq qunarlyǵyn arttyrý, aýyl sharýashylyǵy alqaptarynyń jáne úı irgelik jerleriniń ıgerilýi barysy da talqylanyp, sala basshylaryna tıistitapsyrmalar berildi.
OQO ákiminiń baspasóz qyzmeti
