Saryaǵash qalasynyń turǵyny 53 jastaǵy Aibóbi Dúisenbi Soltústik Qazaqstan oblysy Shoqan Ýálihanov aýdanynyń Alqaterek aýylyna qonys aýdaryp bara jatyr. Otbasyndaǵy 5 adammen úisiz, jumyssyz júrgen Aibóbi jańa mekende baspana men jumys tabylady dep úmittenedi.
– Bir ai buryn balam Alqaterektiń tynys-tirshiligimen tanysyp kelgen. Ulym – dánekerleýshi, kelinim – tárbieshi, ózim – aspazshymyn. Ákimdigi jumys taýyp berýge ýáde etti. Ol jaqta úi baǵasy da arzan eken. Kóshýdi uiǵardyq, - deidi ol.
Saryaǵash aýdandyq jumyspen qamtý ortalyǵynyń direktory Shirinbek Eshanqulovtyń Azattyqqa aitýynsha, Soltústik Qazaqstan oblysynyń Shoqan Ýálihanov jáne Aqjar aýdandaryna qonys aýdaryp bara jatqan 30 otbasyndaǵy jandarǵa memleketten kvota bólinedi.
– Mysaly, otaǵasyna 105 myń teńge, al otbasynyń árbir múshesine 75 myń teńge shamasynda qarjylai kómek beriledi. Bul tek qana kóship barǵanda bir rettik beriletin kómek. Kóship barǵandar múmkindinshe baspanamen, jumyspen qamtylatyn bolady, - deidi sheneýnik.
Halyq tyǵyz ornalasqan Ońtústik Qazaqstan aimaǵynan egin jáne mal sharýashylyǵyn damytýǵa jumys kúshine suranys bar eldiń soltústik óńirine qonys aýdarý bastalǵanyna úshinshi jyl.
Jergilikti biliktiń málimeti boiynsha, biyl jyl basynan beri Saryaǵash aýdanynan 140 múshesi bar 28 otbasy Soltústik Qazaqstanǵa kóship ketken.
